रायपुर, 09 फरवरी 2020। मुख्यमंत्री श्री भूपेश बघेल ह आज कांकेर जिला के भानुप्रतापपुर म आयोजित ‘‘लयांग-लयोर करसाना पण्डुम’’ जिला स्तरीय शारीरिक, बौद्धिक अउ सांस्कृतिक क्रीड़ा प्रतियोगिता के समापन समारोह म सामिल होइन। ये बेरा म ऊंखर कोति ले 79 करोड़ 64 लाख 04 हजार रूपिया के 202 काम मन के भूमि पूजन अउ 05 करोड़ 36 लाख 99 हजार रूपिया के 02 काम मन ल लोकार्पण घलोक करे गीस, संगेच 02 हजार 202 हितग्राही मन ल 11 लाख 89 हजार रूपिया के कई ठन चीज मन के वितरण घलोक करिन।
समारोह ल संबोधित करत होइन मुख्यमंत्री श्री बघेल ह कहिन कि वार्षिक परीक्षा के बाद मार्च-अप्रैल महिना म बस्तर ओलंपिक के आयोजन करे जाही। ‘‘लयांग-लयोर करसाना पण्डुम’’ म संघरे सबो युवा अउ छात्र-छात्रा मन ल बधाई देवत उमन कहिन कि कांकेर जिला म हर साल ये प्रकार के आयोजन करे जाही। रायपुर म आयोजित नेशनल ट्रायबल डांस फेस्टिवल के उल्लेख करत उमन कहिन कि ये मां 25 राज्य 06 केन्द्र शासित प्रदेश अऊ 06 देश के लोक कलाकार मन ह अपन लोक संस्कृति अउ कला के प्रदर्शन करिन, जेखर से छत्तीसगढ़ के देश अऊ विदेश म एक विशेष पहिचान बने हे। उमन कहिन कि छत्तीसगढ़ सांस्कृतिक रूप ले समृद्ध प्रदेश हे, इहां के संस्कृति अऊ प्रकृति ल हमला बचाना अऊ बढ़ाना घलोक हे।
समारोह म कांकेर विधानसभा क्षेत्र के विधायक श्री शिशुपाल शोरी, अंतागढ़ विधानसभा क्षेत्र के विधायक श्री अनूप नाग, संसदीय सलाहकार श्री राजेश तिवारी, नगर पंचायत भानुप्रतापपुर के अध्यक्ष सुनील बबला पाढ़ी, बस्तर अउर दक्षिण क्षेत्र आदिवासी विकास प्राधिकरण के सदस्य बिरेश ठाकुर, जिला पंचायत सदस्य हेमन्त धु्रव संग वरिष्ठ प्रशासनिक अधिकारी, जनप्रतिनिधिगण अउ छात्र-छात्रा अउ आमनागरिक अड़बड़ झन उपस्थित रहिन।
