हमर सरकार ह परंपरागत व्यवसाय ल संरक्षित करे के दिशा म करत हे काम: श्री बघेल

रायपुर, मुख्यमंत्री श्री भूपेश बघेल काली मुख्यमंत्री निवास म चर्म शिल्पकार विकास बोर्ड के शपथ ग्रहण समारोह म सामिल होइन। मुख्यमंत्री ह बोर्ड के नव नियुक्त अध्यक्ष तरूण बिजौर अऊ सदस्यगण, श्री खिलावान बघेल, श्रीमती सरोजनी रात्रे, अऊ श्री तुलसी दौड़िया ल नवा जिम्मेदारियों बर बधाई अऊ शुभकामना दीन। श्री बघेल ह कहिन कि मोला आशा हे कि बोर्ड के अध्यक्ष सब्बो सदस्य ल जेन जिम्मेदारी देहे गए हे ओला पूरा समर्पण भाव ले करत प्रदेश के प्रगति म भागीदारी निभाहू। ये बेरा म कृषि मंत्री श्री रविन्द्र चौबे, राज्य अनुसूचित जाति के अध्यक्ष श्री के.पी खान्डे अऊ उपाध्यक्ष श्रीमती पदमा मनहर घलोक उपस्थित रहिन।
ये बेरा म मुख्यमंत्री ह कहिन कि मानव सभ्यता के शुरूआत ले चमड़ा के महत्व रहे हे। पहिली चमड़ा ले बने जूता चप्पल पहनत रहेन। धीरे-धीरे विकास के दौड़ म चमड़ा के व्यापार ह प्रभावित होइस, चमड़ा के उपयोग कम होत गीस। जूता चप्पल के निर्माण म घलोक दूसर पदार्थ के उपयोग होए लगिस।
मुख्यमंत्री ह कहिन कि हमर सरकार बने म हम परंपरागत व्यवसाय मन ल संरक्षित करे के काम करेन, हमन गौठान बनाएन। उमन कहिन कि परंपरागत व्यवसाय ले बने उत्पाद मन ल आधुनिक बाजार म अच्छा प्रतिसाद मिलय ते पाए के एला उत्पाद मन के बने पैकेजिंग कराए के व्यवस्था करेन, ब्राडिंग करेन अऊ उंखर बिक्री बर शहर मन म सी मार्ट के व्यवस्था करे गीस। संगेच रूरल इन्डस्ट्रियल पार्क के स्थापना करे गीस। एखर विकास बर 600 करोड़ रूपिया बजट के प्रावधान करे गीस। एखर से हमार परंपरागत व्यवसाय मन के विकास के संग गांव म आन व्यापार करे के घलोक अवसर मिलही। कार्यक्रम म मुख्यमंत्री ल उंखर फोटू भेंट करे गीस। ये बेरा म समाज के आन प्रतिनिधी घलो उपस्थित रहिन।