विश्व मानसिक स्वास्थ्य दिवस म होइस विधिक जागरूकता शिविर के आयोजन

दुर्ग, माननीय जिला अउ सत्र न्यायाधीश संग अध्यक्ष जिला विधिक सेवा प्राधिकरण श्री संजय कुमार जायसवाल के विशेष मार्गदर्शन म अउ श्री आशीष डहरिया, सचिव जिला विधिक सेवा प्राधिकरण दुर्ग के निर्देशन म विश्व मानसिक स्वास्थ्य दिवस के अवसर म पैरालीगल वालिन्टियर्स श्री विनय घनशाला अऊ श्री डुलेश्वर मटियारा कोति ले विधिक जागरूकता शिविर के आयोजन करे गीस।
जानबा के मुताबिक विधिक जागरूकता शिविर के आयोजन रिसाली, मरोदा, भिलाई, राजेन्द्र पार्क दुर्ग, वृद्धाश्रम दुर्ग, स्वास्थ्य भवन मोहलई मन म करे गीस जेमां समाज के हरेक वर्ग के नागरिक सामिल होइन। शिविर म पैरालीगल वालिन्टियर्स मन जनमानस ल शारीरिक स्वास्थ्य के संगे-संग मानसिक स्वास्थ्य ल मजबूत बनाए के बारे म बताइन। एखरे संग मनखे मन ल विधिक रूप ले जागरूक करे के खातिर कानून के कई पहलु मन के जानकारी देवत संविधान ले मिले मौलिक अधिकार अऊ कर्तव्य मन के बारे म बताए गीस। ए बेरा म जिला विधिक सेवा प्राधिकरण कोति ले जरूरतमंद मन ल निःशुल्क विधिक सहायता देहे के योजना के बारे म तको बताए गीस।
विश्व मानसिक स्वास्थ्य दिवस के अवसर म आयोजित विधिक जागरूकता शिविर के मुख्य उद्देश्य मानसिक स्वास्थ्य निरंतरता के बारे म जागरूकता बढ़ाना, मानसिक बीमारी ले जुड़े कलंक ल कम करना अऊ मानसिक दबाव म आ के उठाये गए आत्मघाती कदम उपर रोक लगाना रहिस। संगेच जनमानस ल कानूनी जानकारी प्रदान करत विधिक सेवा प्राधिकरण के महत्व ल उजागर करना रहिस।