जिला विधिक सेवा प्राधिकरण राजनांदगांव विधिक जागरूकता कैम्प

राजनांदगांव, देश के सबो नागरिक मन बर उचित, निष्पक्ष अऊ न्यायिक प्रक्रिया सुनिश्चित कराए बर जागरूकता फैलाय के उद्देश्य ले राष्ट्र विधिक सेवा प्राधिकरण अउ राज्य विधिक सेवा प्राधिकरण छत्तीसगढ़ कोति ले जिला विधिक सेवा प्राधिकरण राजनांदगांव के अध्यक्ष अऊ जिला न्यायाधीश के मार्गदर्शन म मेगा कैम्प के आयोजन करे गीस। जिहां राजनांदगांव के ग्रामीण क्षेत्र मन म विधिक जागरूकता अभियान चलाए गीस अऊ मोटर यान अधिनियम, घरेलु हिंसा ले महिला मन के संरक्षण अधिनियम, लैंगिक अपराध ले बालक मन के संरक्षण अधिनियम, साईबर क्राईम अऊ नालसा संग सालसा कोति ले चलाए जात योजना मन के संबंध म हर वर्ग के मनखे मन तक जानकारी पहुंचाए गीस। मेगा कैम्प के आयोजन ग्राम मनकी, तोरनकट्टा, खुटेरी, ईरा, सांकरा, अऊ धीरी म करे गीस। जिहां जिला न्यायालय राजनांदगांव के न्यायिक मजिस्ट्रेट श्री आशीष भगत अउ न्यायिक मजिस्ट्रेट कुमारी रूचि मिश्रा ह आमजन के बीच जाके कानून ले संबंधित जानकारी दीन।
ये मेगा कैम्प म अवईया नेशनल लोक अदालत जेखर आयोजन 12 नवम्बर 2022 के होवईया हे वोखर संबंध म जानकारी देहे गीस। कैम्प म बताए गीस कि आपसी राजीनामा के आधार म प्रकरण के निराकरण कराए जा सकत हे। मोटर यान अधिनियम के बारे म जानकारी देवत बताए गीस कि कहूं आप मन अपन वाहन के उपयोग करत हव, त ये वाले ध्यान देवव कि आप मन के पास ड्राईविंग लाईसेंस, वाहन के पंजीयन कागद, थर्ड पार्टी बीमा अउ जरूरत मुताबिक परमिट लेके घर ले निकलव। घरेलु हिंसा ले महिला मन के संरक्षण अधिनियम म ये बताए गीस कि कहूं आप मन के संग कोनो प्रकार के घरेलू हिंसा अपराध होथे, त अपन अधिकार बर न्यायालय के दरवाजा खटखटा सकत हव। लैंगिक अपराधों ले बालकों के संरक्षण अधिनियम के संबंध म लइका मन के संगें-संग ऊंखर परिजन मन ल जागरूक रहे के जानकारी देहे गीस। कहूं अइसे कोनो अपराध होवत हे त तुरंते रिपोट दर्ज करावव। कानूनी प्रक्रिया मन म व्यक्तिगत जानकारी गुप्त रखे जाही। साईबर क्राईम के संबंध म ये बताए गीस कि अभी हाल म मोबाईल फोन अऊ इंटरनेट के उपयोग लइका मन अऊ युवक मन म बाढ़ गए हे। जेखर से मोबाईल सुविधा के गलत उपयोग ना करके केवल पढ़ाई के संबंध म उपयोग करव। आमजन ल अधिनियम मन के कई ठन प्रावधान के जुर्माना अऊ कारावास के संबंध म अवगत कराए गीस अउ नि:शुल्क विधिक सेवा के योजना अउ नालसा हेल्प लाईन नंबर 15100 अउ 14567 के जानकारी देहे गीस।