- छत्तीसगढ़ सरकार आदिवासी मन के हित बर ऊंखर संग खड़े हे
- शिकायत मन के लउहे जांच कराए के दीन भरोसा
- मुख्यमंत्री ह हसदेव अरण्य क्षेत्र के मनखे मन ले करिन मुलाकात
रायपुर, मुख्यमंत्री श्री भूपेश बघेल ह काली संझा राजधानी रायपुर स्थित अपन निवास कार्यालय म हसदेव अरण्य क्षेत्र सरगुजा ले पदयात्रा करके रायपुर आए मनखे मन ले सौजन्य मुलाकात करिन। ये बेरा म उमन कहिन कि राज्य सरकार पहिली घलोक आदिवासी मन के संग खड़े रहिस, आजो खड़े हे अऊ आगू घलोक आदिवासी मन के संग खड़े रइही।
श्री बघेल ह कहिन कि भारत सरकार कोति ले लेमरू एलीफेंट रिजर्व बर 452 वर्ग किलोमीटर के नोटिफिकेशन जारी करे गए हे, फेर राज्य सरकार ह एला बढ़ाके 1995 वर्ग किलोमीटर करे के पहल करे हे। उमन कहिन कि 1995 वर्ग किलोमीटर के क्षेत्र म ओ क्षेत्र के सबो कोल ब्लॉक के एरिया आ गे हे। लेमरू एलीफेंट रिजर्व के क्षेत्र 1995 वर्ग किलोमीटर ले कम नइ होवय। हसदेव अरण्य क्षेत्र के मनखे मन ले मिले सबो शिकायत मन के जल्दी परीक्षण कराए जाही।
वन मंत्री श्री मोहम्मद अकबर ह हसदेव अरण्य क्षेत्र ले आए मनखे मन ल बताइस कि हाथी प्रोजेक्ट के अंतर्गत सेमरसोत, बादलखोल, तमोर पिंगला, अभ्यारण बनाय गे हे। एखर अलावा लेमरू हाथी रिजर्व घलोक बनाए जाना हे। पिछला सरकार ह लेमरू हाथी रिजर्व बर साल 2007 म 452 वर्ग किलोमीटर के क्षेत्र तय करे रहिस। साल 2007 ले 2018 तक ये म कोनो नोटिफिकेशन जारी नइ करे गीस। दिसम्बर 2018 म नवा सरकार के गठन के बाद लेमरू एलीफेंट रिजर्व बर फेर सर्वे कराए गीस। एलीफेंट रिजर्व के क्षेत्र 452 वर्ग किलोमीटर ले बाढ़ाके 1995 वर्ग किलोमीटर करे गीस। ये म मंत्रीमंडल के सैद्धांतिक सहमति घलोक बनिस। उमन कहिन कि लेमरू एलीफेंट रिजर्व के क्षेत्रफल 1995 वर्ग किलोमीटर करे के संबंध म भारत सरकार ल छत्तीसगढ़ सरकार कोति ले अनुमति मिले के प्रत्याशा म प्रस्ताव भेजे गए हे। श्री अकबर ह कहिन कि जिहां तक परसा कोल ब्लॉक के संबंध म ग्रामसभा ले नियम विरूद्ध प्रस्ताव अऊ ये काम ले जुड़े अधिकारी मन उपर कार्रवाई जांच के विसय हे। जांच के बाद ही येकर उपर कार्रवाई करना संभव हे। ये बेरा म स्कूल शिक्षा मंत्री डॉ. प्रेमसाय सिंह टेकाम, खाद्य मंत्री श्री अमरजीत भगत, छत्तीसगढ़ राज्य खनिज विकास निगम के अध्यक्ष श्री गिरीश देवांगन घलोक उपस्थित रहिन।
