रायपुर, 13 सितंबर 2020। यातायात नियम के उल्लंघन करइया मन के खिलाफ पुलिस ह कार्रवाई ल तेज कर दे गेहे। 92 वाहन चालक के लाइसेंस निरस्त कर के कार्रवाई घलो करत हे। संग ही परिवहन विभाग ल प्रकरण भेज देहे हे। दु दिन ले चौराहा म नियम तोड़इया मन के पांच सौ ले जादा वाहन चालक के ई-चालान भेज के नोटिस जारी करे हे। उहें बाहरी राज्य ले अवइया वाहन चालक के घलो ई-चालान काटे गेहे।
डीएसपी ट्रैफिक सतीश ठाकुर ह बतइस कि कोरोना संक्रमण के रोकथाम म यातायात अमला के व्यस्त होय के सेती यातायात नियम के उल्लंघन करइया वाहन चालक के खिलाफ चालानी कार्रवाई नइ करे जात रिहिस, लेकिन लगातार यातायात नियम के उल्लंघन होय म फिर ले चालानी कार्रवाई तेज करे गेहे। शहर के प्रमुख चौक-चौराहा म बिना हेलमेट, तीन सवारी, तेज रफ्तार, रांग साइड म चलइया अउ बिना लाइसेंस के वाहन चलइया मन के खिलाफ चालानी कार्रवाई शुरू करे गेहे। तेज रफ्तार, शराब सेवन करके नशा के हालत म वाहन चलइया, यातायात संकेत के अनदेखी करइया फर्राटा भरईया मन के वाहन चालक मन के लाइसेंस निलंबन करना घलो शुरू कर दे गेहे। शनिवार के 92 वाहन चालक के लाइसेंस निरस्त कर प्रकरण परिवहन विभाग ल भेजे गेहे। एकर अलावा जेन चौराहा म यातायात के जवान उपस्थित नइ रहाय उहा आईटीएमएस सीसीटीवी कैमरा के माध्यम ले नियम तोड़इया मन के वाहन चालक के ई-चालान काटे जात हे।