मुख्यमंत्री श्री विष्णु देव साय हा डॉ. श्यामा प्रसाद मुखर्जी के 125वीं जयंती म करिन नमन
रायपुर, मुख्यमंत्री श्री विष्णु देव साय हा डॉ. श्यामा प्रसाद मुखर्जी के 125वीं जयंती के बेरा म पंडित रविशंकर शुक्ल विश्वविद्यालय म आयोजित देस स्तरीय समारोह म उमन ला सरधापूर्वक नमन करत कहिन के डॉ. मुखर्जी के जीवन देसभक्ति, अक्छर-गियान, त्याग अउ अखंड भारत के संकलप के अभूतपूर्व उदाहरण आय। उमन कहिन के प्रधानमंत्री श्री नरेंद्र मोदी के अगुवाई म देस आज डॉ. मुखर्जी के सपना ला पूरा करे के रद्दा म सरलग आगू बढ़त हे। धारा 370 के हटना, अंत्योदय के भावना उपर अधारित बिकास अउ देस के एकता ला मजबूत करे जइसे कतकोन फैसला उंकर बिचार मन ला मूरत रूप देइया एतिहासिक कदम आय।
मुख्यमंत्री श्री साय हा कहिन के डॉ. श्यामा प्रसाद मुखर्जी के सुरता ला सदा बर बनाय रखे खातिर राज्य्य के सबो संभाग अउ जिला मुख्यालय मन म उंकर मूरति बइठारे जाही। एकर बर 10 करोड़ रुपिया के रासि मंजूर करे गे हे।
मुख्यमंत्री हा कहिन के डॉ. मुखर्जी सिरिफ एक दूरदरसी राज्यनेताच नइ रहिन, भलुक गजब के शिक्षाविद घलो रहिन। सिरिफ 33 बछर के उमर म विश्वविद्यालय के कुलपति बने के गौरव पवइया डॉ. मुखर्जी हा स्वतंत्र भारत के पहिली उद्योग मंत्री के रूप म घलो बड़का काम करिन। देस के हित ला सब ले ऊपर रखे के उंकर कसम अइसन रहिस के उमन अपन सिद्धांत मन ले समझौता करे के बलदा मंत्रिमंडलेच ले इस्तीफा देना मंजूर करिन।
जम्मू-कश्मीर म ‘एक देस म दू निसान, दू बिधान अउ दू प्रधान’ के बेवस्था के बिरोध म डॉ. मुखर्जी हा एतिहासिक लड़ाई लड़िन अउ देस के एकता अउ अखंडता बर अपन सबले बड़े बलिदान दे दिन। आज जम्मो देस उंकर त्याग अउ देसभक्ति ला गदगद होके सुरता करथे।
मुख्यमंत्री श्री साय हा कहिन के प्रधानमंत्री श्री नरेंद्र मोदी हा देस के गौरव भरे इतिहास अउ बिसरे-भुलाय स्वतंत्रता संग्राम सेनानी मन ला सहि सम्मान देवाए के काम करे हें। ‘हर घर तिरंगा’ अइसन जनआंदोलन हा देसभक्ति के नवा उरजा भरे हे। उमन बताइन के राज्य्य सरकार घलो नवा रायपुर म बने सहीद बीरनारायण सिंह स्मारक अउ जनजातीय स्वतंत्रता संग्राम सेनानी संग्रहालय म छत्तीसगढ़ के 14 बीर स्वतंत्रता सेनानी मन के सुरता म बिसेस दीर्घा बनाय गए हे।
मुख्यमंत्री हा कहिन के राज्य्य सरकार हा पंडित दीनदयाल उपाध्याय अउ डॉ. श्यामा प्रसाद मुखर्जी के अंत्योदय के बिचार ला अधार बनाके काम करत हे। पाछू ढाई बछर म ‘मोदी के गारंटी’ के जादा तर संकलप मन ला पूरा करे गे हे। नक्सल प्रभावित इलाका मन म ‘नियद नेल्लानार योजना’ के सुघर माध्यम ले सड़क, बिजली, पीए के पानी, सुवास्थ्य, अक्छर-गियान अउ संचार जइसे मूलभूल सुबिधा मन ला लउहे चहुंचाय जात हे। 500 ले जादा गांव मन तक अधारभूत सुबिधा मन के बिस्तार होय हे, 700 ले जादा मोबाइल टावर बइठारे गे हे अउ बस्तर अंचल म बड़े पैमाना म स्वास्थ्य जांच अउ ईलाज अभियान चलाय जात हे।
मुख्यमंत्री हा जवान मन सो कहिन के उमन डॉ. श्यामा प्रसाद मुखर्जी के देससेवा, गियान, त्याग अउ समरपन के आदरस मन ला अपन जीवन म अपनावंय अउ बिकसित भारत अउ बिकसित छत्तीसगढ़ के निरमान म अपन सक्रीय साझीदारी देवंय।
ए अवसर म पंडित रविशंकर शुक्ल विश्वविद्यालय के कुलपति प्रो. सच्चिदानंद शुक्ल, कुलसचिव डॉ. शैलेन्द्र कुमार पटेल, बिद्वान मन, गुरुजी मन, चेला-चेली मन अउ भारी संख्या म गनमान्य नागरिक मन हाजिर रहिन।
