- स्टील प्लांट मन गैसीय ऑक्सीजन के उपलब्धता के संग 8100 बिस्तर के क्षमता वाले अस्पताल तियार तको करत हें
दिल्ली, 13 मई 2021। स्टील उद्योग संकट के समय म राष्ट्र के सेवा म एकजुट हे। 10 मई के स्टील संयंत्र मन कोति ले कुल 4686 मीट्रिक टन जीवनरक्षक तरल चिकित्सा ऑक्सीजन (एलएमओ) के आपूर्ति करे गए। ये मां हमर प्रदेश के भिलाई स्टील प्लांट के बड़का भूमिका हे। ये आपूर्ती म सेल कोति ले 1193 मिट्रिक टन, आरआईएनएल कोति ले 180 मिट्रिक टन, टाटा समूह कोति ले 1425 मिट्रिक टन, जेएसडबल्यू कोति ले 1300 मिट्रिक टन अऊ बांचे ऑक्सीजन के आपूर्ति सार्वजनिक अऊ निजी क्षेत्र के आन इस्पात कंपनी मन कोति ले करे गए हे। देश म तरल चिकित्सा ऑक्सीजन के कुल उत्पादन रोजेच करीबन 9500 मीट्रिक टन हो गए हे, फेर स्थापित क्षमता के करीबन 130 फीसदी उपयोग होथे। एलएमओ के कुल उत्पादन म इस्पात संयंत्र करीबन आधा योगदान देवत हे।
स्टील संयंत्र एलएमओ के आपूर्ति ल बढ़ाय बर अहम कदम उठाए हे। जेखर तहत नाइट्रोजन अऊ आर्गन गैस के उत्पादन म कमी अऊ ज्यादातर संयंत्र मन म केवल एलएमओ के उत्पादन सामिल हे। स्टील कंपनी मन बर आम तौर म अपन भंडारण टैंक म एलएमओ के 3.5 दिन के सुरक्षा स्टॉक रखे के जरूरत होथे। जे न वाष्पीकृत हो जाथे अऊ कहूं कोनो ऑक्सीजन संयंत्र म कुछ समस्या आथे त ओखर उपयोग करे जाथे। इस्पात मंत्रालय कोति ले इस्पात उत्पादक मन के संग सरलग संपर्क के माध्यम ले, सुरक्षा स्टॉक ल आधा दिन तक कम कर दे गए हे जेखर से एलएमओ के आपूर्ति म अड़बड़ बढ़ोतरी होए हे।
केंद्रीय इस्पात अऊ पेट्रोलियम अऊ प्राकृतिक गैस मंत्री श्री धर्मेंद्र प्रधान (Union Minister of Steel and Petroleum and Natural Gas, Mr. Dharmendra Pradhan) ह पाछू सोमवार के इस्पात मंत्रालय अऊ एखर सार्वजनिक उपक्रम मन के अधिकारी मन के संग एक बैठक करे रहिन। जिहां उमन तरल चिकित्सा ऑक्सीजन के आपूर्ति अऊ इस्पात संयंत्र मन कोति ले स्वास्थ्य सेवा ल बेहतर करे के दिशा म उठाए गए उदीम मन के समीक्षा करिन।
स्टील संयंत्र मन कोति ले 8,100 बिस्तर के (एमएमएनएस – हजीरा, जेएसडब्ल्यू – डोल्वी अऊ विजयनगर, जिंदल-हिसार, एचजेडएल – उदयपुर, सेल – राउरकेला, भिलाई, बोकारो, दुर्गापुर, बर्नपुर, आरआईएनएल – वाइजैग, टाटा – कलिंगनगर, जेएसआर, अंगुल) क्षमता वाले अस्पताल घलोक स्थापित करे जात हे। ये अस्पताल संयंत्र के आस-पास के क्षेत्र मन म गैसीय ऑक्सीजन के क्षमता के संग तियार करे जात हे।
श्री प्रधान ह तेल, गैस अऊ इस्पात सार्वजनिक उपक्रमों ले घलोक अपील के हे कि ओ मन सबो संबंधित पक्ष मन के पूर्ण टीकाकरण के दिशा म आगू बढ़यं। उमन कहिन के एखर से कर्मचारी मन अऊ संबंधित पक्ष के मनोबल बाढ़ही। ये कदम ले कोविड-19 के खिलाफ लड़ाई ल अऊ मजबूती मिले के संग दुनिया म सबले बड़े टीकाकरण अभियान ल गति देहे म घलोक मदद मिलही।
