राधारमण नगर म नवा तालाब बनिस ‘जल-खजाना’, बदलिस गांव के तकदीर

रायपुर, ग्राम पंचायत सोनवर्षा के राधारमण नगर म बने नवा तरिया गांव के जीवनधारा बन गए हे। कई बछर ले भीषण जल संकट झेलत गांव वाले मन खातिर ये तालाब कोनो वरदान ले कम नइ हे। पहिली गर्मी म हैंडपंप सूखा जात रहिस अऊ मनखे मन कई मील दुरिहा ले पानी लाय ल परत रहिस, फेर मनरेगा के तहत 12.80 लाख रुपिया ले बने ए तरिया ह गांव के तस्वीर बदल देहे हे।
खदान क्षेत्र तीर बने ए तरिया म वर्षा जल सुरक्षित रहिथे, जेखर से पूरा साल पीए अउ निस्तार के संग सिंचाई के सुविधा उपलब्ध रइथे। तकनीकी रूप ले मजबूत निर्माण के सेती तालाब म पानी लंबा समय तक बने रइथे। ए काम ले गांव वाले मन ल रोजगार घलोक मिलीस।
तालाब बने के बाद खेत मन म सरलग नमी रहे ले फसल उत्पादन बाढ़े हे अऊ किसान मन के आय म सुधार आए हे। एखर संगेच ग्रामीण बाबू सिंह, जीत नारायण, एक्का प्रसाद अऊ रविशंकर ह तालाब म 3000 मछली बीज छोड़के मछली पालन शुरू करे हे, जेखर से अकतहा आय के नवा साधन मिले हे।
गांव वाले मन के मुताबिक अब गांव म पानी के कमी नइ हे, खेती बेहतर होवत हे अऊ मछली पालन ले कमई घलोक बाढ़त हे। राधारमण नगर के ये तालाब आज जल प्रबंधन अऊ आजीविका संवर्धन के आदर्श मॉडल बनके उभरत हे, जेन हर गांव ल आत्मनिर्भरता के नवा रद्दा देखावत हे।