मनरेगा ले बदल गे हे अब फूलमती के जिनगी

बीजापुर, मनरेगा (महात्मा गांधी राष्ट्रीय ग्रामीण रोजगार गारंटी अधिनियम) कई मनखे मन के जिंदगी बदलत हे। आजीविका के साधन ल सशक्त करके आर्थिक समृद्धि के रद्दा खोलना होवय या हाथ म कोनो काम नइ होए म रोजगार उपलब्ध कराके आमदनी के जरिया देना होवय, गांव मन म सामुदायिक परिसंपत्ति मन के निर्माण के संग मनरेगा व्यापक पैमाना म मनखे मन के जीवन आसान बनावत हे। बीजापुर के 24 साल के युवती फूलमती के घलोक जीवन मनरेगा ह कई अरथ म बदल देहे हे। कोडोली पंचायत के ए सीधी-सादी युवती के हाथ म गांव म मनरेगा काम मन म श्रमिक मन ल काम बांटे अऊ उंखर ले काम कराए के महती जिम्मेदारी हे। वो पाछू दू बछर ले मेट के जिम्मेदारी बखूबी निभावत हे।
नान्हे उम्मर म ही फूलमती के मूड़ ले पिता के साया उठ गए रहिस, अऊ फेर सात सदस्य वाले बड़का परवार के जिम्मेदारी ओकर अऊ ओखर बड़े भाई ऊपर आ परे रहिस। बारहवीं तक पढ़ाई करे फूलमती ए परिस्थिति मन म गांव म ही रहि के रोज़गार खोजत रहिस, ताकि घर के सदस्य मन के घलोक ध्यान रख सकय। वो मनरेगा के अंतर्गत चलइया काम मन म मजदूरी करे जात रहिस। इही बीच ग्राम पंचायत सचिव राममूर्ति ह ओला ये जानकारी दीस के पढ़े-लिखे लड़की मन ल गोदी के नाप अऊ काम कराए बर मेट रखे जाथे।
फूलमती ह एखर बाद साल 2019 ले ग्राम रोजगार सहायक सुश्री कमलदई नाग के मार्गदर्शन म मेट के काम सीखना शुरू करिस। अपन लगन ले थोरकेच दिन म ही वो ह मेट के काम म दक्ष हो गे। भैरमगढ़ जनपद पंचायत म मेट मन बर आयोजित विशेष प्रशिक्षण म फूलमति ह दू हफ्ता के प्रशिक्षण घलोक हासिल करिस, जेन ह ओखर कार्यकुशलता बढ़ाईस। प्रशिक्षण के बाद अब वो कार्यस्थल म श्रमिक मन के बेहतर तरीका ले प्रबंधन कर पाथे। प्रशिक्षण म नागरिक सूचना पटल के निर्माण अऊ जॉब-कार्ड अद्यतनीकरण के बारे म घलोक ओला काफी कुछ जाने ल मिलीस। मनरेगा ल जीवन के महत्वपूर्ण हिस्सा मनइया फूलमती अपन बीते दिन ल सुरता करत बताथे के वो ह ए काम ले मिले पारिश्रमिक ल जोड़के 23 हजार रुपिया सकेल के रखे रहिस अऊ जब घर के मरम्मत के काम चलत रहिस, त ये रुपिया ले घर बनाए म अपन योगदान दीस।
कोडोली म ग्राम रोजगार सहायक अऊ मेट, दुनों के महिला होए के फायदा गांव के महिला मन ल मिलत हे। इंकर मिलनसार व्यवहार के चलते पाछू तीन साल म मनरेगा काम मन म महिला मन के भागीदारी 50 प्रतिशत ले जादा रहे हे। वित्तीय साल 2019-20 म 277 महिला मन ह काम करत 7658 मानव दिवस, 2020-21 म 329 महिला मन ह 11 हजार 684 मानव दिवस अऊ चालू वित्तीय साल 2021-22 म सितमबर महिना तक 268 महिला मन ह 5299 मानव दिवस के रोजगार प्राप्त करे हें।