पशुपालक लतीफ ल होवत हे गोबर ले अकतहा आमदनी: गोधन न्याय योजना ले कृषि काम म आवत हे तेजी

रायपुर, 10 अगस्त 2020। राज्य सरकार के महत्वाकांक्षी ‘गोधन न्याय योजना’ के 20 जुलाई हरेली तिहार के दिन ले चालू होए ले राज्य के किसान मन म जिहां उत्साह हे उहें गोबर खरीदी ले उमन म खुसी अऊ उमंग के वातावरण घलोक हे। ये उमंग के घड़ी म कांकेर जिला के दुर्गूकोंदल विकासखंड अंतर्गत ग्राम तराई घोटिया के पशुपालक मन म घलोक गोबर खरीदी के पहिली किस्त के राशि मिले ले बड़ उत्साह हे। श्री लतीफ बघेल ह बताइस के वोखर तीर 9 भैंस, चार गाय अऊ चार बछड़ा हे। जेकर से नियमित रूप ले गोबर सकेल के गांव के ही गौठान म बेचे रहिस जेकर पइसा वोखर खाता म जमा हो गए हे। पशुपालक श्री बघेल ह बताइस के दुग्ध उत्पादन ले तो कमइ होतेच रहिस संग म अब गोबर बेचे ले घलोक अकतहा आमदनी होवत हे। गोबर ले होवइया आय ले अब कृषि काम मन म तेजी आही। वो ह राज्य सरकार के ‘गोधन न्याय योजना’ के सराहना करत मुख्यमंत्री श्री भूपेश बघेल के मुक्‍त कंठ ले धन्यवाद ज्ञापित करके आभार व्यक्त करे हे।