प्रधानमंत्री स्वनिधि योजना के तहत करजा बर मिलिस 2668 आवेदन : 47 प्रतिशत प्रकरण पास

धमतरी, वैश्विक महामारी कोविड-19 के आपातकालीन दौर म आर्थिक रूप ले कमजोर हो गए स्ट्रीट वेंडर मन के सहायता बर केन्द्र सरकार प्रधानमंत्री स्वनिधि योजना लागू करे गए हे। ये योजना के तहत जिला म स्ट्रीट वेंडर मन स्टार्ट-अप बर दू हजार 668 आवेदन मिलिस, जेमा ले एक हजार 255 आवेदक मन ल लोन पास करे गीस जेन कुल मिले आवेदन के 47.03 प्रतिशत हे।
लीड बैंक मैनेजर श्री प्रबीर कुमार रॉय ह बताइस के योजना के तहत कोविड-19 के प्रतिकूल दौर म आर्थिक स्थिति डांवाडोल होए स्ट्रीट वेंडर मन ल अपन कारोबार शुरू करे बर ये योजनांतर्गत बैंक ऋण देहे जात हे। एखर तहत ठेला, गुमटी, फुटपाथ म या घूम-घूमके व्यवसाय करइया ल 10 हजार रूपिया तक के लोन देहे जात हे। उमन बताइस के कहूं ऋण म लेहे गए रकम के भुगतान वेंडर मन एक साल के भीतर कर देहीं, त उनला 20 हजार तक के अग्रिम लोन के पात्रता मिल जाथे। संगेच ये घलोक बताइस के लोन के सात प्रतिशत तक के ब्याज दर ल लोनधारक ल पटाना परथे, जबकि ओखर बाद के अंतर राशि के भुगतान केन्द्र शासन ह करथे। लीड बैंक मैनेजर ह बताइस के ये योजना के लाभ वो मनखे मन ल नइ मिल पावय जेमन या तो पहिली लोन लेके ओखर भुगतान नइ करे हें, या फेर बाद म लोन लेहे म रूचि नइ दिखाए हें। येकर सेती जिला के सिरिफ 47 प्रतिशत आवेदक मन ल ही एखर तहत लाभ मिल पाइस। श्री रॉय ह ये घलोक बताइस के शेष बचे आवेदन मन ल स्वीकृत करे बर नगरीय निकाय के लाभार्थि मन ले संबंधित बैंकर्स सरलग सम्पर्क करत हे अऊ नियमानुसार ऋण प्रकरण मन ल स्वीकृत करे बर बैंक प्रयास करत हे, जेखर फॉलोअप लीड बैंक कोति ले रोजेच लेहे जात हे।
लीड बैंक मैनेजर ह जानकारी देवत बताइस के मनखे मन म ये योजना ल लेके जागरूकता लाय बर बड़ौदा आरसीटी के माध्यम ले कई शाखा मन के शाखा प्रबंधक ल‘मैं डिजिटल हूं‘ के पांच दिवसीय प्रशिक्षण नगर निगम सभाकक्ष म निःशुल्क मुहैया कराए गीस ताकि योजना के लाभ लेहे जादा ले जादा मनखे मन ल प्रोत्साहित करे जा सकय। उमन कहिन के कोरोना संक्रमण के उलट दौर म घलोक बैंकर्स अपन दायित्व मन के यथासंभव निर्वहन करिस। संक्रमण काल म जिहां करीबन सबो शासकीय कार्यालय बंद रहिस, ओ समय घलोक बैंक मन ल खुले रखके बैंकर्स ह अपन सकारात्मक भूमिका निभाए हे।