रायपुर, 02 अप्रेल 2020। प्रदेश म लॉकडाउन के बेरा म कोनो मनखे भूखे झन रहय एखर खातिर राज्य सरकार ह व्यापक प्रबंध करे हे। सबो जिला मन म भिखारी, निराश्रित अऊ जरूरतमंद मनखे मन के चिन्हारी करके ओ मन ल तात जेवन अऊ सूखा राशन देहे जात हे। समाज कल्याण विभाग कोति ले 14 हजार 608 निराश्रित, भिक्षुक, तीसर लिंग समुदाय अऊ जरूरतमंद मनखे के चिन्हारी करे गए हे। मानव सेवा के ये काम म विभाग के संग जिला प्रशासन, पुलिस संग कई समाजसेवी संस्था मन घलोक लगे हें। जरूरतमंद मन तक भोजन पहुंचाए के राज्य स्तर म सरलग ऑनलाईन मॉनिटरिंग करे जात हे।
भोजन के सुरक्षित वितरण बर विस्तृत दिशा निर्देश जारी करे गए हे। संस्था मन ल जिला प्रशासन अउ विश्व स्वास्थ्य संगठन कोति ले समय-समय म जारी निर्देश के पालन सुनिश्चित करे ल कहे गए हे। रायपुर संभाग म 4 हजार 813, दुर्ग संभाग म 5 हजार 913, बिलासपुर संभाग म एक हजार 532, बस्तर संभाग म 6 सौ अऊ सरगुजा संभाग म एक हजार 750 जरूरतमंद मनखे के चिन्हारी करके भोजन देहे जात हे। ए मनखे मन ल रेल्वे स्टेशन, बस स्टेंट, नगर पालिक निगम,
चौक-चौराहा, रैन बसेरा, सामुदायिक भवन, मंदिर क्षेत्र, सब्जी बाजार, जनपद पंचायत जइसे जगा मन म भोजन देहे जात हे। जिहां जादा संख्या म बेसहारा अऊ निराश्रित मनखे मन के मिले के संभावना रहिथे। एखर ले अकतहा जरूरतमंद मनखे ल घर-घर पहुंचके घलोक भोजन उपलब्ध कराए जात हे।
