- लॉकडाउनः जरूरतमंद मन तक निःशुल्क भोजन पहुंचाए बनिस फूड कड़ी
रायपुर, 28 मार्च 2020। छत्तीसगढ़ के मुख्यमंत्री श्री भूपेश बघेल ह कहे हें के ‘कोराना वायरस के सेती बने लॉकडाउन के स्थिति म कोनो ल भूखे पेट नइ सुतन दन। ऊंखर ये हुकुम ल चरितार्थ करे बर जिला प्रशासन अऊ नगरीय प्रशासन ह भिखारी, बेसहारा, जरूरतमंद, दिहाड़ी मजदूर, मंदबुद्धी, निराश्रित अउ रोजी-रोटी बर बाहिर नइ जा सकत मनखे मन अउ अइसे परिवार बर भोजन पहुंचाए खातिर बड़का नेटवर्क तियार करके शहर के हर छोर तक अपन पहुंच बनाए गए हे। सबले बड़े बात ये हे के ये काम म स्वयंसेवी संस्था, सेवाभावी संगठन अऊ नागरिक घलोक आगू आके मदद करत हें।
एखर बर रायपुर म ’स्पेशल फूड सेल’ के स्थापना करे गए हे। कलेक्टर डॉ. एस भारतीदासन, वरिष्ठ पुलिस अधीक्षक आरिफ शेख, जिला पंचायत के सीईओ डॉ. गौरव कुमार सिंह अऊ नगर निगम आयुक्त श्री सौरभ कुमार के निर्देशन म 25 मार्च ले ये कंट्रोल रूम 24 घंटा काम करत हे। ये कंट्रोल रूम के दूरभाष नंबर 0771- 4055574 म जरूरतमंद मनखे या परिवार सीधा फोन करके अपन जरुरत बता सकत हे। ये दूरभाष म क्षेत्र के जनप्रतिनिधि, प्रशासनिक अधिकारी, सामाजिक संगठन घलोक जरुरतमंद मनखे के संबंध म जानकारी अउ जगा बता के भोजन सुविधा म सहायता करत हें।
ये स्पेशल सेल अऊ कई ठन संगठन अउ माध्यम ले रायपुर म रोजेच करीबन 8000 फूड पैकेट बांटत हे। लंबा दूरी के मालवाहक के चालक, श्रमिक, अस्पताल, रेलवे स्टेशन आदि क्षेत्र मन म घलोक फूड पैकेट बांटे जात हे। ये काम म नगर निगम के 70 सामाजिक संस्था अउ ऊंखर करीबन 2 हजार वालेंटियर्स मदद करत हें।
सामाजिक संस्था मन अपन संसाधन ले कोरोना के रोकथाम बर सबो जरूरी प्रबंध अउ सावधानी बरतत भोजन तियार करके एकर वितरण करत हें। कंट्रोल रूम म जिला पंचायत, रायपुर स्मार्ट सिटी, महिला बाल विकास, मत्स्य, शिक्षा, रोजगार विभाग के जिला अधिकारी मन ल तैनात करे गए हे अउ जल्दी भोजन उपलब्ध कराए बर एनजीओ के सहयोग लेहे जात हे, जऊन भोजन के सुविधा उपलब्ध कराए बर फोन कॉल आए के बाद तुरंते रवाना होके जरूरतमंद तक पहुंचावत हे।
रायपुर नगर निगम के अपन कंट्रोल अउ कमांड सेन्टर म दूरभाष क्र. 0771-4320202 के माध्यम ले जोन अउ वार्डवार फल, सब्जी, अनाज, दवइ अउ आन उपयोगी जिनिस मन के घर पहुंच सेवा बर 280 दुकान के जानकारी आम मनखे मन ल देहे जात हे, ये सुविधा के उपयोग ले क्षेत्रवासी घर बइठे जरूरी सामान प्राप्त करत हें।