बलौदाबाजार 03 मई 2021 सम्मार। लॉकडॉउन के बेरा म मनरेगा के माध्यम ले गंवइहा मन ल रोजगार मुहैया कराए म बलौदाबाजार-भाटापारा जिला पूरा राज्य म अव्वल हवय. महात्मा गांधी राष्ट्रीय ग्रामीण रोजगार गारंटी योजना के माध्यम ले 69,521 गंवइहा श्रमिक मन ल रोजगार मिलत हावय. जेकर ले गंवई अर्थव्यवस्था ल मजबूती बज्जुर मिलत हावय.
राज्य सरकार के पंचायत अउ ग्रामीण विकास विभाग ह आज राज्य भर म मनरेगा ले सम्बंधित मई महीना के प्रकाशित आंकड़ा म श्रमिक मन ल रोजगार उपलब्ध कराए म बलौदाबाजार -भाटापारा जिला राज्य म अव्वल हवय। दूल्ली म रायगढ़ अउ तीसरइया जगा म राजनांदगांव जिला हे। सहायक परियोजना अधिकारी मनरेगा के के साहू ह बताइन कि मई महीना के पहिली सप्ताह म जिला म कुल 69,521 झिन श्रमिक कार्यरत हवय। जेमा जनपद पंचायत कसडोल म 20,505, बिलाईगढ़ 18,166,सिमगा 12,593 बलौदाबाजार 6,943,भाटपारा 5,926 अउ पलारी म 5,388 झिन श्रमिक कार्यरत हवयं। गंवइहा मन ल उंखरे गांवेच म रोजगार उपलब्ध कराय ले उंखर आर्थिक स्थिति ल बज्जुर मजबूती मिलही।
उन मन आगू बताइन कोरोना संक्रमण के चलत जम्मो कार्यस्थल मन कोविड गाइडलाइन के पालन तको सुनिश्चित करे जावत हे। जेकर सरलग निगरानी जिला स्तर ले करे जावत हे। प्रमुखतः एके संघरा 2-3 ठन काम ल प्रारम्भ करके वार्ड वार श्रमिक मन बांट के, एक गोदी के बीच म एक गोदी के अन्तराल, एक परिवार ल एके जगा काम म नियोजित करना,सेनेटाईजर अउ मास्क के उपयोग शामिल हवयं।
कलेक्टर सुनील कुमार जैन ने दी बधाई
कलेक्टर सुनील कुमार जैन ह जिला पंचायत के ये उपलब्धि म मनरेगा म कमइया सबो कर्मचारी अउ अधिकारी मन ल बधाई दीन। संगे —संग कहीन ये ह जगा ह सरीदिन बनें रहय जेकर बर आप सबो उदीम करत रहव । संगे —संग मनरेगा कोविड गाईडलाइन के अनिवार्य रूप ले पालन होवय एकर विशेष धियान रखयं।
