आचार संहिता लागू होए के बाद निगरानी दल मन ह 30 करोड़ 47 लाख के नगदी अऊ समान करिन जब्त

रायपुर, 2 अपरेल 2024। राज्य म लोकसभा आम निर्वाचन-2024 बर 16 मार्च ल आदर्श आचार संहिता के प्रभावी होए के बाद ले 1 अपरेल तक के स्थिति म 30 करोड़ 47 लाख रुपए के अवैध धन राशि अउ समान जब्त करे गए हे। एमां 9 करोड़ 11 लाख रुपिया नगद राशि सामिल हे।
मुख्य निर्वाचन पदाधिकारी कार्यालय ले मिले जानकारी के मुताबिक प्रवर्तन एजेंसी (इन्फोर्समेंट एजेंसीज) कोति ले निगरानी के बेरा पाछू 1 अपरेल तक 24 हजार 226 लीटर अवैध शराब जब्त करे गए हे, जेकर कीमत 56 लाख रुपिया हे। संगेच 1 करोड़ 60 लाख रुपिया कीमत के 885 किलो नसा के समान घलोक जब्त करे गए हे। सघन जांच अभियान के समय 1 करोड़ 64 लाख रुपिया कीमत के 24.16 किलोग्राम कीमती जेवर अउ रत्न घलोक जब्त करे गए हे। एकर ले अकतहा आन समान, जेकर कीमत 17 करोड़ 58 लाख रुपिया हे, घलोक जब्त करे गए हे।