गणतंत्र दिवस म दिल्ली म प्रदर्शित झांकी के नर्तक दल ह मुख्यमंत्री ले करिस सौजन्य मुलाकात

रायपुर, 11 फरवरी 2021। गणतंत्र दिवस के अवसर म नई दिल्ली के राजपथ म ’’छत्तीसगढ़ के पारम्परिक लोक वाद्य’’ थीम उपर प्रदर्शित छत्तीसगढ़ राज्य के झांकी के संग लोक कलाकार मन के दल मुख्यमंत्री श्री भूपेश बघेल ले आज ऊंखर निवास म सौजन्य मुलाकात करिस। ये बेरा म दल के प्रमुख लोक रागिनी अऊ कुहुकी संस्था के संचालक श्री रिखी क्षत्रिय ह मुख्यमंत्री ल उपहार स्वरूप तम्बूरा भेंट करिस।
मुख्यमंत्री श्री बघेल ह राष्ट्रीय स्तर म छत्तीसगढ़ के झांकी के उत्कृष्ट प्रदर्शन बर कलाकार मन संग पूरा टीम ल बधाई अऊ शुभकामना दीन। ये मौका म कृषि मंत्री श्री रविन्द्र चौबे अऊ स्कूल शिक्षा मंत्री डॉ. प्रेमसाय सिंह टेकाम घलोक मौजूद रहिन।
जानबा हे कि छत्तीसगढ़ के पारंपरिक वाद्य यंत्र मन म आधारित राज्य के झांकी देश भर के मनखे मन के आकर्षण के केन्द्र रहिस। छत्तीसगढ़ के झांकी म छत्तीसगढ़ के लोक संगीत के वाद्य वैभव ल प्रदर्शित करे गए रहिस। छत्तीसगढ़ के जनजातीय क्षेत्र मन म प्रयुक्त होवइया लोक वाद्य मन ल ऊंखर सांस्कृतिक परिवेश के संग बड़ खूबसूरत ढंग ले देखाए गए रहिस। वो झांकी म छत्तीसगढ़ के दक्षिण म स्थित बस्तर ले लेके उत्तर म स्थित सरगुजा तक कई अवसर म प्रयुक्त होवइया लोक वाद्य सामिल करे गए रहिस। इंकर माध्यम ले छत्तीसगढ़ के स्थानीय तीज त्योहार अऊ रीति-रिवाज म न म निहित सांस्कृतिक मूल्य मन ल घलोक रेखांकित करे गए रहिस।
झांकी के ठीक आगू वाला हिस्सा म एक जनजाति महिला बइठे रहिस, जेन बस्तर के प्रसिद्ध लोक वाद्य धनकुल बजावत रहिस। धनकुल वाद्य यंत्र, धनुष, सूप अऊ मटका ले बने रहिस। झांकी के बीच के हिस्सा म तुरही रहिस। तुरही के ऊपर गौर नृत्य प्रस्तुत करत जनजाति रहिस। झांकी के आखरी म माँदर बजात युवक रहिस। झांकी म इंकर अलावा अलगोजा, खंजेरी, नगाड़ा, टासक, बांस बाजा, नकदेवन, बाना, चिकारा, टुड़बुड़ी, डांहक, मिरदिन, मांडिया ढोल, गुजरी, सिंह बाजा या लोहाटी, टमरिया, घसिया ढोल, तम्बूरा ल सामिल करे गए रहिस।
मुलाकात करइया म नर्तक दल के सदस्य कुलदीप सार्वा, उग्रसेन देवदास, रामकुमार पाटिल, डोरे लाल साहू, प्रदीप ठाकुर, जयालक्ष्मी ठाकुर, कु. केवरा सिन्हा, संजीव राजपूत, पारस रजक, नेहा विश्वकर्मा, साधना सामिल रहिन। ये बेरा म आयुक्त सह संचालक जनसम्पर्क श्री तारन प्रकाश सिन्हा, अपर संचालक श्री जे.एल. दरियो, संयुक्त संचालक श्री पवन कुमार गुप्ता अऊ छत्तीसगढ़ झांकी के टीम लीडर श्री तेजबहादुर सिंह भुवाल उपस्थित रहिन।