छत्तीसगढ़ सरकार महिला मन के अधिकार के रक्षा, उंखर शिक्षा, सेहत, स्वावलम्बन, अऊ आत्मसम्मान बर सरलग उदीम करत हे: श्री भूपेश बघेल

रायपुर, 14 मार्च 2021। मुख्यमंत्री श्री भूपेश बघेल के आज प्रसारित रेडियावार्ता लोकवाणी के 16वां कड़ी म मुख्यमंत्री श्री बघेल ह मातृ शक्ति, माता-बहिनी अऊ बेटी मन संग होए गोठ-बात के प्रसारण करे गीस। मुख्यमंत्री ह कहिन कि राज्य सरकार ह महिला मन के अधिकार मन के रक्षा, उंखर शिक्षा, सेहत, स्वावलम्बन अऊ आत्मसम्मान बर ठोस काम करे हे। उमन ए क्षेत्र मन म होवत काम मन उपर विस्तार ले लोकवाणी म चर्चा करिन। मुख्यमंत्री ह कहिन कि नारी शक्ति के भागीदारी ले छत्तीसगढ़ म छोटे-छोटे योजना, छोटे-छोटे पूंजी अऊ थोर-थोर उदीम ल मिलाके एक नवा आर्थिक क्रांति के जनम होही अऊ ये आर्थिक क्रांति विकास के एक टिकाऊ मॉडल बनके पूरा दुनिया म नाम कमाही। वनांचल अऊ ग्रामीण क्षेत्र मन म महिला मन के स्वावलंबन बर चालू करे गए योजना मन ले बड़ अकन महिला मन स्वावलंबी बनत हें। ग्राम सुराजी योजना, गोधन न्याय योजना, लघु वनोपज मन के समर्थन मूल्य म खरीदी अऊ गौठान मन म संचालित योजना मन ल माता-बहिनी मन के भागीदारी ले ही सफलता मिलत हे। रूरल इंडस्ट्रियल पार्क के सफल संचालन के पीछू असम म नारी के शक्ति होही। मुख्यमंत्री ह लोकवाणी म नारी शक्ति ले कोविड-19 टीकाकरण म सहयोग के आव्हान करत कहिन कि टीकाकरण के बाद घलोक मास्क, सुरक्षित दूरी अऊ हाथ ल साबुन ले बार-बार धोए जइसे उपाय मन के पालन रहना होही।