रायपुर, 09 फरवरी 2020। प्रदेश भर के गांव अउ शहर के जगा-जगा म मुख्यमंत्री के रेडियोवार्ता लोकवाणी उछाह ले सुने गीस। मुख्यमंत्री श्री भूपेश बघेल ह आज अपन मासिक रेडियोवार्ता लोकवाणी के सातवां कड़ी म ‘परीक्षा प्रबंधन अऊ युवा कैरियर के आयाम‘ विसय उपर पढ़ईया लईका मन ले आत्मीयता के संग बातचीत करिन। मुख्यमंत्री ह लइका मन ले कहिन कि समय के पूरा सदुपयोग करव, परीक्षा के समय खाना-पीना सादा रखव, हल्का व्यायाम करव। मोबाइल, टीवी आदि ले दूर रहव, जेखर से आंखी ल आराम मिलय अऊ दिमाग घलोक शांत रहय। श्री बघेल ह कहिन कि आप मन अपन पूरा प्रयास करव जादा अंक मिलय त अच्छा हे अऊ नइ मिलय तभो अच्छा हे। एखर से कुछ बनय बिगड़य नहीं। बिना जादा अंक पाए बहुत अकन मनखे अपन सुग्घर काम के दम म उंचा पहुंचथें। उमन लइका मन ल परीक्षा के तैयारी, तनाव ले निपटे के उपाय के जानकारी देवत लइका मन के अभिभावक मन ले घलोक ये आग्रह करिन कि ओ मन परीक्षा के तैयारी म अपन लइका मन के सहयोगी बनयं। परीक्षा म जादा अंक लाय के दबाव झन डारयं। प्रदेश के कई शहरों अऊ गांव मन के लइका मन ह मुख्यमंत्री ले बहुत अकन सवाल पूछे गीस जेकर मुख्यमंत्री ह सिलसिलेवार जवाब दीन।
लोकवाणी : (आपकी बात-मुख्यमंत्री श्री भूपेश बघेल के साथ) प्रसारण तिथि – 9 फरवरी, 2020
विषय – ‘परीक्षा प्रबंधन और युवा कैरियर के आयाम‘
