मुंगेली, 14 फरवरी 2020। काली मुंगेली के सिटी कोतवाली थाना म होए बिहाव के खबर सोसल मीडिया म बिकट वायरल होवत हे। वायरल खबर के संग लल्लूराम डॉट कॉम के वीडियो तको वायरल हे। जानबा हे के मुंबेली म थानेदार के आगू प्रेमी जोड़ा ह अपन परिजन मन के आगू एक-दूसर ल माला पहिराइन अऊ फेर प्रेमी ह प्रेमिका के मांग भरिस।
खबर हे के मुगेली जिला के लालपुर थाना क्षेत्र के प्रतापपुर के अनिल साहू अऊ कोतवाली थाना क्षेत्र के रामगढ़ निवासी संतोषी साहू के पाछू तीन बछर ले प्रेम प्रसंग चलत रहिस। उमन एक दूसर से बिहाव करना चाहत रहिन फेर, लड़की के परिवार वाले मन राजी नइ रहिन। प्रेमी जोड़ा ह परिवार वाले मन ल नइ मना सकिन त उमन कोतवाली थाना प्रभारी आशीष अरोरा ल अपन दुख गोहराईन।
थानेदार आशीष अरोरा ह प्रेमी जोड़ा के बात सुनिस अउ युवक अऊ युवती के परिजन मन ल बुलवाके दोनो पक्ष के मनखे मन ल समझाइश दीन। एखर बाद टीआई के चेम्बर म ही पुलिस कर्मी अऊ परिवार वाले मन के मौजूदगी म प्रेमी जोड़ा के बिहाव करा देहे गीस। हिंदू रीति रिवाज के मुताबिक प्रेमी जोड़ा ह एक-दूसर ल माला पहिराइन अऊ फेर प्रेमी ह प्रेमिका के मांग म सिंदूर लगाके विवाह के रसम ल पूरा करिस। टीआई अरोरा ह दुनों ल मिठई चावा के असीस दीस।
देखव वीडियो –
लल्लूराम ले साभार
