प्रेमी—प्रेमिका नौकरी लगाय अउ जमीन खरीदे के नाम म करत रिहिस ठगी, अब पुलिस के गिरफ्त म

रायपुर, 26 अक्टूबर 2020। जमीन खरीदे अउ नौकरी देवय के नाम म लोगन ले ठगी करइया प्रेमी—प्रेमिका ल पुलिस ह गिरफ्तार करे हे। बतादन कि प्रेमी खुद ल जमीन के खरीददार अउ प्रेमिका ल वकील बताके लोगन मन ल अपन शिकार बनावत रहिस। दुनों के खिलाफ अलग-अलग पांच थाना म रिपोर्ट दर्ज हे। पुलिस ह ये मामला म आरोपित प्रद्युमन शर्मा अउ युवती ल पकड़ के पूछताछ करिस। पूछताछ म दुनों झन बतइस कि विज्ञापन देखा के विक्रेता के देहे गेहे नंबर म फोन करके जमीन खरीदे के झांसा देत रिहिस। श्रवण कुमार ह खम्हारडीह थाना म धोखाधड़ी के रिपोर्ट दर्ज कराय हे। उहें एक अउ रिपोर्ट सिविल लाइन थाना मेडिकल स्टोर संचालक दीपक जिंदवानी ह रिपोर्ट दर्ज करवाय हे। दुनों ही मामला म एक ही तरीका ले ठगी करे के बात आगु आय म पुलिस ह आरोपी के नंबर के जांच शुरू करे हे। मोबाइल नंबर के आधार म बैंक के जानकारी निकाल के उंखर सही ठिकाना के पता लगइस। जांच के दौरान आरोपी ले एनआरडीए अउ सिंचाई विभाग म नौकरी के फर्जी नियुक्ति पत्र घलो मिले हे। पुलिस ह दुनों आरोपी ल गिरफ्तार कर लेहे हे।