बिहान ले अनिता के बदलिस किस्मत : हॉलर मिल, किराना अऊ दोना-पत्तल व्यवसाय ले बनिस लखपति दीदी

गौरेला-पेंड्रा-मरवाही, बिलासपुर संभाग के गौरेला-पेंड्रा-मरवाही जिला पेंड्रा विकासखंड के ग्राम भाड़ी के मध्यमवर्गीय परिवार के अनिता आज ‘लखपति दीदी’ के नाव ले प्रसिद्ध हे। वोखर ये सफलता ग्रामीण आजीविका मिशन ‘बिहान योजना‘ के देन हे, जेन ओ ल स्वावलंबन के रद्दा देखाइस। अनिता ह बताइस के वो शुरू ले ही कुछ कर देखाय के चाह रखत रहिस, फेर आर्थिक स्थिति कमजोर होए के सेती ओ ल अवसर नइ मिल पात रहिस। जब वो ह संतोषी महिला स्व-सहायता समूह ले जुड़ीस अऊ बिहान योजना के अंतर्गत लोन के सुविधा पाइस, त अपन सपना ल आकार देना शुरू करिस। वो ह एक लाख रुपिया लोन लेके हॉलर मिल, दोना-पत्तल निर्माण मशीन अऊ किराना दुकान के शुरुआत करिस। धीरे-धीरे मेहनत रंग लाईस अऊ आज ओ ए तीनों गतिविधि मनले बनेच आमदनी पावत हे। वोखर जीवन के दिशा बदल गए हे अऊ अब ओ ह आत्मनिर्भर, सशक्त अऊ प्रेरणास्रोत बन गे हे।