रायपुर, 17 अप्रैल 2020। कोरोना महामारी के फर्जी जानकारी सोशल मीडिया म झन फैलावव, कहूँ कुछु शंका हे त स्वास्थ्य विभाग ले संपर्क करके पहिली जानकारी ले लव। नहीं त आप ल पुलिस गिरफ्तार घलोक कर सकत हे। अइसनहे बिन जाने-समझे कोरोना संदिग्ध के फर्जी जानकारी एक मनखे ह व्हाट्सएप म देहे रहिस तेला ये काम बड़ महंगा परिस।
सिटी कोतवाली पुलिस ह लउहे कार्यवाही करत एफआईआर दर्ज करके आरोपी युवक ल गिरफ्तार कर लीस। ये मामला गरियाबंद जिला के सिटी कोतवाली थाना क्षेत्र के ये। सिटी कोतवाली थाना प्रभारी आर के साहू के बताती गिरफ्तार युवक के नाम अजय कुमार बंजारे हे, वो ह गरियाबंद के मजरकटा के रहइया ये।
आरोपी युवक ह वाट्सअप ग्रुप म गरियाबंद के डाक बंगला क्षेत्र म कोरोना पॉजीटिव मरीज होए के पोस्ट शेयर करे रहिस। सूचना मिले म पुलिस ह मामला ल संज्ञान म लेके जांच पड़ताल करिस, त ये जानकारी झुठ निकलिस। ये बात म पुलिस ह कार्रवाई करत आरोपी अजय ल गिरफ्तार कर लीस। सिटी कोतवाली पुलिस ह आरोपी के खिलाफ आईपीसी के धारा 193 अऊ राज्य शासन के आपदा प्रबंधन अधिनियम 2005 के धारा 54 के तहत मामला पंजीबद्ध कर करे हे।
जिला प्रशासन ह सुरुच ले मनखे मन ल कोरोना ले जुड़े झुठ झन फैलाए के आग्रह करे जात हे। तेखर बाद घलो सोशल मीडिया म कई प्रकार के भरम फैलाए वाला जानकारी मनखे मन शेयर करत हें, जऊन गैरकानूनी हे।
