रायपुर, 23 अक्टूबर 2020। आराध्य देवी माँ बम्लेश्वरी के नगरी डोंगरगढ़ देश के पर्यटन मानचित्र म एक प्रमुख धार्मिक स्थल के रूप म सामिल हो गए हे। भारत सरकार पर्यटन मंत्रालय के प्रसाद योजना के तहत आराध्य देवी माँ बम्लेश्वरी के नगरी डोंगरगढ़ ल धार्मिक स्थल के रूप म विकसित करे अऊ सौन्दर्यीकरण बर 43 करोड़ 33 लाख रूपिया के स्वीकृति देहे गए हे। मुख्यमंत्री श्री भूपेश बघेल अऊ पर्यटन मंत्री श्री ताम्रध्वज साहू के विशेष प्रयास ले भारत सरकार के पर्यटन मंत्रालय ह माँ बम्लेश्वरी के नगरी डोंगरगढ़ ल प्रसाद योजना म सामिल करे हे। डोंगरगढ़ ल महत्वपूर्ण धार्मिक स्थल के रूप म मान्यता देहे के संग एखर विकास अऊ सौन्दर्यीकरण बर स्वीकृति घलोक दे देहे गए हे। पर्यटन मंत्री श्री ताम्रध्वज साहू ह एला प्रदेश बर एक बड़का उपलब्धि बतात कहिन के एखर से छत्तीसगढ़ के पर्यटन ल वैश्विक स्तर म एक अलग पहिचान मिलही। श्रद्धालु मन अऊ पर्यटक मन के संख्या बढ़े ले स्थानीय मनखे मन ल रोजगार मिलही।
हम आप ल बता देवन के डोंगरगढ़ ल महत्वपूर्ण धार्मिक स्थल के रूप म मान्यता देहे बर छत्तीसगढ़ टूरिज्म बोर्ड अऊ सचिव पर्यटन विभाग ह केन्द्रीय पर्यटन मंत्रालय ले सरलग पत्राचार अऊ प्रस्तुतिकरण करत रहिस। आखरी म पर्यटन मंत्रालय भारत सरकार ह डोंगरगढ़ ल धार्मिक स्थल के रूप म विकसित करे बर प्रसाद योजना म सामिल करे के मंजूरी दे दीस। ये परियोजना के तहत माँ बम्लेश्वरी मंदिर के सीढ़िया मन म पर्यटन सुविधा, पार्किंग, तालाब सौंदर्यीकरण अऊ पिलग्रिम एक्टिविटी सेंटर (श्रद्धालु मन बर सुविधा केन्द्र) विकसित् करे जाही संगेच प्रज्ञागिरी पहाड़ी म घलोक श्रद्धालु मन अऊ पर्यटक मन बर सुविधा विकसित करना प्रस्तावित हे। ये योजना के मुख्य आकर्षण के केन्द्र श्री यंत्र के डिजाईन म विकसित होवइया पिलग्रिम एक्टिविटी सेंटर (श्रद्धालु मन बर सुविधा केन्द्र) होही।
