महतारी वंदन योजना ले मिलिस आर्थिक आत्मनिर्भरता, अब मधु कुजूर खुद पूरा करत हे अपन छोटे-छोटे खरचा

बलरामपुर जिला के एक महतारी बर ‘महतारी वंदन योजना’ ह संबल बन के आय हे। अब मधु कुजूर ला अपन छोटे-छोटे खरचा बर कोनो के आगू हाथ फैलाय के जरूरत नइ परय।

बलरामपुर, सरकार के जनहितकारी योजना मन जब सही जरूरतमंद मन तक पहुँचथे, त ओमन सिरिफ आर्थिक मदद नइ देवंय, बल्कि जिनगी म आत्मविश्वास अउ सम्मान घलो लेके आथें। राज्य सरकार के महतारी वंदन योजना घलो अइसने एक ठन पहल आय, जे ह प्रदेश के महतारी मन ला आर्थिक सहारा देके ओमन ला आत्मनिर्भर बनाय म बड़े भूमिका निभावत हे।
बलरामपुर जिला के ग्राम खटवाबरदर म रहइया श्रीमती मधु कुजूर के जिनगी म घलो ए योजना ह एक ठन बढ़िया बदलाव लाय हे। मधु कुजूर ह बताइस के पहिली घर के छोटे-मोटे खरचा बर घलो ओमन ला परिवार के दूसर सदस्य मन ऊपर निर्भर रहे बर परत रहिस। कम कमाई होय के सेती कइ पइत परिवार के छोटे-छोटे जरूरत मन ला पूरा करना घलो मुस्किल हो जात रहिस। अइसन म मन म इच्छा होय के बाद घलो ओमन अपन जरूरत ला टाल देवत रहिन। एक दिन आंगनबाड़ी केंद्र म ओमन ला महतारी वंदन योजना के जानकारी मिलिस। ओमन उहें ले फार्म भरिन अउ पात्रता पूरा होय के बाद ओमन ला योजना के लाभ मिलना शुरू हो गे।
मधु कुजूर ह बताइस के अभी तक ओमन ला योजना के तहत लगभग 25 हजार रूपया मिल गे हे। ए पइसा ह भले बहुत बड़े नइ लागत होही, फेर ओखर बर ए आत्मनिर्भरता के एक नवा शुरुआत बन गे हे। अब ओमन घर के छोटे-मोटे खरचा म हाथ बँटावत हें। ओमन ह मुस्कुरावत बताइन के अब अपन मोबाइल के रिचार्ज घलो ओमन खुद कर लेथें, जबकि पहिली एकर बर घलो ओमन ला अपन घरवाला के रद्दा जोहे बर परत रहिस।
श्रीमती मधु कुजूर ह बताइस के योजना ले मिलइया ए सहायता राशि ओखर बर एक ठन सहारा बन गे हे। एकर ले ओखर आत्मविश्वास बाढ़े हे अउ अब ओमन ला ए अहसास होथे के ओमन घलो परिवार के जिम्मेदारी म अपन योगदान दे सकथें। परिवार म ओखर भागीदारी अउ सम्मान घलो पहिली ले जादा हो गे हे।
श्रीमती मधु कुजूर ह ए योजना बर प्रधानमंत्री श्री नरेंद्र मोदी अउ छत्तीसगढ़ के मुख्यमंत्री श्री विष्णु देव साय ला धन्यबाद देथें। ओखर कहना हे के महतारी वंदन योजना ह न केवल आर्थिक मदद देहे हे, बल्कि महिला मन ला आत्मविश्वास के संग आगू बढ़े के नवा ताकत घलो देहे हे।