मध्यस्थ टीम के सदस्य, जवान श्री राकेश्वर सिंह मन्हास ल उन्कर घर सकुशल छोड़े बर जम्मू जाहीं
रइपुर, 12 अप्रैल 2021 सम्मार। मुख्यमंत्री दाउ भूपेश बघेल ले आज इहां उन्कर घरू कार्यालय म नक्सली मन के कब्जे ले रिहा होए कोबरा बटालियन के जवान श्री राकेश्वर सिंह मन्हास अउ ओला रिहा करवइया मध्यस्थ टीम के सदस्य सर्व श्री पद्मश्री श्री धर्मपाल सैनी, श्री जय रुद्र करे, श्री तेलम बौरैया, श्रीमती सुखमती हप्का अउ कोबरा बटालियन के जवान श्री राकेश्वर सिंह मन्हास अउ पत्रकार श्री गणेश मिश्रा अउ श्री मुकेश चंद्राकर ह सौजन्य मुलाकात करीन। मुख्यमंत्री ह उन्कर शाल अउ श्रीफल भेंट करके अभिनंदन करीन । गृहमंत्री श्री ताम्रध्वज साहू अउ उद्योग मंत्री श्री कवासी लखमा तको ये बेरा म उपस्थित रिहिन हे ।
मुख्यमंत्री ह ये बेरा म कहीन कि कोबरा बटालियन के जवान ल रिहा करवाए बर मध्यस्थ टीम ह संकट के बेरा म बड़ सूझबूझ के परिचय देवत बड़ सहज रूप ले अपन काम ल अंजाम तक पहुंचाइन अउ जवान ल सकुशल रिहा करवाए म सफल होइन। ए बूता ल जतेक सहराए जाय कमेच हे । ए जम्मो घटनाक्रम म पूरा देश के नजर रिहिसे। जवान के रिहा होए म छत्तीसगढ़ संग पूरा देश ह राहत के सांस लीन ।
मुख्यमंत्री दाउ भूपेश बघेल ह पुलिस के बड़का अधिकारी मन ल कोबरा बटालियन के जवान श्री राकेश्वर सिंह मन्हास ल रिहा करवाए बर हर संभव प्रयास करे के निर्देश दिए रिहिन। मुख्यमंत्री सरलग बस्तर पुलिस के संपर्क म रिहिने अउ ये मामले म करे जावत कार्यवाही के सरलग जानकारी लेवत रिहिने । ये बेरा म विशेष पुलिस महानिदेशक (नक्सल ऑपरेशन) श्री अशोक जुनेजा, डीआईजी नक्सल ऑपरेशन श्री ओ.पी. पाल, सीआरपीएफ के आईजी श्री प्रकाश डी. भी उपस्थित रिहिन। बीजापुर ले वीडियो कॉन्फ्रेंस के माध्यम ले बीजापुर के कलेक्टर श्री रीतेश अग्रवाल, डीआईजी कोबरा श्री ए.पी.सिंह, पुलिस अधीक्षक श्री कमलोचन कश्यप संग पत्रकारगण सर्वश्री पी. रंजनदास, यूकेश चंद्राकर, चेतन कांपेवार अउ श्री के.शंकरदास, जगदलपुर ले कमिश्नर बस्तर श्री जी.आर. चुरेन्द्र, आईजी बस्तर श्री पी.सुंदरराज, डीआईजी कोबरा बटालियन श्री अखिलेश सिंह अउ पत्रकार श्री राजा राठौर जुरियाए रिहिन।