- नाचत गात एक हज़ार कलाकार मन ह करिन रोड शो
- संस्कारधानी के सड़क मन म बगरिस लोकरंग
- सांस्कृतिक प्रस्तुति मन ह दर्शक मन ल देर रात तक बांधे राखिस
- 50 लोक कलाकार मन के होइस सम्मान
राजनांदगांव, 2 मार्च 2020। मितान छत्तीसगढ़ी लोक कलाकार कल्याण संघ राजनांदगांव के तरफ ले काल नगर म मितान लोक महोत्सव 2020 के ऐतिहासिक अउ सुरता राखे लइक आयोजन होइस। मंझनिया रोड शो के माध्यम ले 1000 ले जादा कलाकार मन ह अपन परंपरागत वेशभूषा म नाँदगांव के सड़क म पूरा लोक संस्कृति ल उतार दीन, उहें मंझनिया ले लेके रात तक स्थानीय पद्मश्री गोविंदराम निर्मलकर ऑडिटोरियम म रंगारंग सांस्कृतिक प्रस्तुति देके छत्तीसगढ़ के समृद्ध शाली लोक संगीत अउ लोककला ल मंच म जीवंत कर दीन। 50 ले जादा बड़का लोक कलाकार मन के सम्मान करके मितान ह नगर म एक नवा परंपरा के शुरुआत करिस।
खचाखच भरे ऑडिटोरियम म मितान लोक महोत्सव 2020 के मुख्य अतिथि डोंगरगांव के विधायक दलेश्वर साहू रहिन। अध्यक्षता महापौर श्रीमती हेमा देशमुख ह करिन। विशेष अतिथि गुंडरदेही के विधायक कुंवर सिंह निषाद अऊ राजगामी संपदा न्यास राजनांदगांव के अध्यक्ष विवेक वासनिक अऊ शहर कांग्रेस कमेटी के अध्यक्ष कुलबीर छाबड़ा रहिन। पगरइत मन ह मां सरस्वती के फोटू के आगू दीया जला के अउ पूजा-अर्चना करके कार्यक्रम के शुभारंभ करिन। छत्तीसगढ़ के सुप्रसिद्ध गायिका पद्मश्री ममता चंद्राकर के सियानी म लोक गायिका छाया चंद्राकर, सुश्री मोना सेन श्रीमती रजनी रजक, श्रीमती पूनम विराट, स्वर्णा दिवाकर, रिंकी देवांगन, लता खापर्डे, सुप्रसिद्ध गायक कुलेश्वर ताम्रकार, दुकालू यादव, सुनील तिवारी समेत जम्मो नेउताए लोक कलाकार मन ह राज्य गीत अरपा पैरी के धार के सामूहिक संगीतमय प्रस्तुति देके आयोजन ल नवा गरिमा प्रदान करिन। ये गीत के प्रस्तुति के बेरा म ऑडिटोरियम म बइठे दर्शक मन ह न केवल एखर स्वर म स्वर मिलाइन भलुक अपन जगा म खड़े होके राज्य गीत के सम्मान घलोक करिन।
सांस्कृतिक प्रस्तुति मन के कड़ी म पद्मश्री ममता चंद्राकर ह तोर मन कइसे लागे राजा, छाया चंद्राकर ह तोर पिरित के मारे, मोना सेन ह मोला निक लागे राजा अऊ मया होही रे संगी, सुनील तिवारी ह फाग गीत, रजनी रजक ह तोर मन कइसे लागे राजा, स्वर्णा दिवाकर ह मुख मुरली बजाए, दुकालू यादव ह जस गीत, रिंकी देवांगन अऊ दुष्यंत हरमुख ह ददरिया अऊ रिखी क्षत्रिय ह कोकई कांटा टूरी अऊ कुलेश्वर ताम्रकार ह जुन्ना लोकप्रिय छत्तीसगढ़ी गीत प्रस्तुत करके दर्शक मन के ताली बटोरिन। ए गीत मन म कारी बदरिया मोखा, गुरुर, लोक सांस्कृतिक मंच धरोहर, धरती के सिंगार भोथिपार के कलाकार मन ह भाव नृत्य प्रस्तुत करिन। छत्तीसगढ़ी फिल्म स्टार करण खान ह अपन हिट फिल्म मंदराजी अऊ बेनाम बादशाह के डायलॉग सुनाइस। सुपरहिट फिल्म मोर छैंया भुइयां के खलनायक मनमोहन सिंह ठाकुर ह घलोक अपन फिल्म के डायलॉग सुना के वाहवाही बटोरिस। हास्य कलाकार पप्पू चंद्राकर अऊ घेवर यादव ह लाफ्टर शो के माध्यम ले दर्शक मन ल देर तक हंसाइस।
सांस्कृतिक कार्यक्रम मन के प्रस्तुति के क्रम म लोक सांस्कृतिक मंच धरोहर राजनांदगांव, धरती के सिंगार भोथिपर, मोर मयारू संगी टेडसरा, झंकार राजनांदगांव, लोक तिहार छुरिया, संगी के मया गुंडरदेही, जवारा पेंड्री, मयारू मैना चिखली, रजनीगंधा, छत्तीसगढ़ महतारी अऊ कारी बदरिया के कलाकार मन ह मनभावन कार्यक्रम के प्रस्तुति देके दर्शक मन के मन ल मोह लीस।
मंझन 4:00 बजे ले सरलग रतिहा 11:00 बजे तक चले ये कार्यक्रम के समापन स्वर्गीय लक्ष्मण मस्तुरिया के अमर गीत मोर संग चलव रे के संग होइस, जऊन ल मुख्य स्वर महादेव हिरवानी ह दीस। सबो पहुना मन अऊ नेउताए कलाकार मन ह ये प्रतिष्ठा पूर्ण आयोजन ल अड़बड़ सहराईन।
मितान महोत्सव 2020 म सहभागिता करइया बड़का 50 लोक कलाकार मन अऊ लोक सांस्कृतिक मंच के संचालक मन ल कार्यक्रम के मुख्य अतिथि, अध्यक्ष, विशेष अतिथि, मितान के अध्यक्ष राजेश मारू, डॉ चंद्रकुमार जैन आदि ह पारी-पारी ले सुरता चिनहा अउ शाल भेंट करके सम्मानित करिस। पूरा कार्यक्रम के संगीत संयोजन कारी बदरिया मोखा गुरुर के टीम ह करिस। कार्यक्रम के धाराप्रवाह अऊ सफल संचालन भिलाई के श्रीमती रजनी रजक अऊ पत्रकार वीरेन्द्र बहादुर सिंह ह करिस। आभार प्रदर्शन वरिष्ठ गीतकार हर्ष कुमार बिंदु ह करिस।
छत्तीसगढ़ के युगांतर कारी प्रस्तुति चंदैनी गोंदा के पहिली उद्घोषक प्रोफेसर सुरेश देशमुख, राजनांदगांव के वयोवृद्ध संगीतकार बसंत सोनी, प्रसिद्ध फिल्म निर्देशक प्रेम चंद्राकर ,लोकरंग अर्जुंदा के संचालक दीपक चंद्राकर, चंदैनी गोंदा के वरिष्ठ कलाकार श्रीमती शैलजा ठाकुर, रंग झरोखा भिलाई के संचालक दुष्यंत हरमुख, रिखी क्षत्रिय ह कार्यक्रम म अपन उपस्थिति देके आयोजन ल अऊ गरिमामय बनाइन। आयोजन समिति ह सबो के सम्मान करिस। कार्यक्रम ल सफल बनाए म मितान छत्तीसगढ़ी लोक कलाकार कल्याण संघ राजनांदगांव के अध्यक्ष राजेश मारू, उपाध्यक्ष महादेव हिरवानी, सचिव विष्णु कश्यप, संयुक्त सचिव वीरेन्द्र बहादुर सिंह, कोषाध्यक्ष महेश्वर दास साहू, वरिष्ठ सदस्य अउ गीतकार हर्ष कुमार बिंदु अउ साहित्यकार मुन्ना बाबू समेत आयोजन समिति के समस्त सदस्य मन ह महत्वपूर्ण योगदान दीन।
रोड शो करके कलाकार मन ह रचिन इतिहास
मितान लोक महोत्सव के शुरुआत स्थानीय बालाजी मंदिर प्रांगण ले भव्य रोड शो के संग होइस। रोड शो म जिहां पहिली लाइन म मड़ई के संग राउत नाच दल, रीलो नाच दल, पंथी नाच दल, डंडा नाच दल अऊ पास गीत के गायक अपन अपन कला के प्रदर्शन करत चलत रहिन, उहें पुतला नृत्य मनखे मन के कौतूहल अऊ आकर्षण के प्रमुख केंद्र बिंदु रहिस। एखर पीछू सबो लोक सांस्कृतिक मंच के कलाकार मन अपन बैनर के संग नाचत गात चलत रहिन। सबले आखरी म राजनांदगांव के स्वर कोकिला कविता वासनिक, वरिष्ठ गायक कुलेश्वर ताम्रकार, फिल्म अभिनेता करण खान, सुप्रसिद्ध रंगकर्मी पूनम विराट, लोकप्रिय गायिका स्वर्णा दिवाकर रथ म सवार रहिन अऊ अपन गायकी के जलवा बगरावत रहिन। जस गायक दुकालू यादव मानव मंदिर चौक म ट्रक म सवार होइन अऊ मोर गांव के शीतला दाई में हा तोला बंदव ओ गाके दर्शक मन ल मंत्रमुग्ध कर दीस। मितान के सियानी म प्रदेश म पहिली पइत आयोजित लोक कलाकार मन के भव्य अउ ऐतिहासिक रोड शो के जगा-जगा नागरिक मन ह फूल बरसा के अऊ जलपान कराके आतमिय स्वागत करिन जेखर से कलाकार अभिभूत रहिन। बालाजी मंदिर प्रांगण म पूर्व महापौर अजीत जैन, सूर्यकांत जैन, पार्षद शिव वर्मा, महेश साहू, महेश अग्रवाल के सियानी म बजरंग व्यायाम शाला अऊ बाल समाज के सदस्य मन ह कलाकार मन के स्वागत करिन। भारत माता चौक म राजू भंसाली, आजाद चौक म नीरज पब्लिक स्कूल पेंड्री, मानव मंदिर चौक म वरिष्ठ पत्रकार अशोक पांडेय, सुजीत दत्ता बापी अउ हिम्मत सिंह ठाकुर, गांधी चौक म श्री आकाश दास अउ वरिष्ठ पार्षद कुलबीर सिंह छाबड़ा अउ साथी, बांसपाई पारा चौक म पार्षद शरद पटेल अऊ गौरव रस्ता के शुरुआत म नगर के कलाकार गफ्फार खान, शैल किरण, संतोष यादव, सुदेश यादव, रवि रंगारी, मयूर अऊ कृष्ण स्वरूप ठाकुर ह कलाकार साथी मन के संग स्वागत करिन।
