दुरूग पतोरा के महामाया स्व-सहायता समूह ल ‘‘आउटलुक स्पीक आउट छत्तीसगढ़‘‘ म सम्मान

– एक कमरा म उत्पादित मशरूम ले के 55 हजार रूपिया के आमदनी
दुर्ग, दुर्ग जिला के पाटन विकासखंड के पतोरा ग्राम पंचायत के महामाया स्व -सहायता समूह के महिला मन मशरुम उत्पादन के काम करत हें अऊ एखर से बनेच आमदनी पावत हें। स्व-सहायता समूह म कुल 12 सदस्य हे। समूह के महिला मन ह सुरू म भवन म ढांचा तियार करके 350 बैग मशरुम लगाए गए रहिन, जेमां मशरुम बीज बर कुल 20 हजार रूपिया के खरचा करे रहिन। एकर से समूह ह अब तक मशरुम बेचके कुल 55 हजार रूपिया कम डरे हें। मशरुम उत्पादन के संगें-संग समूह के महिला मन आचार, बड़ी, पापड़ के उत्पादन घलोक करथें। एला लोकल मार्केट म बेंच के वो मन अब तक कुल 20 हजार रूपिया के आमदनी पाए हें। जेखर से समूह के महिला मन के आर्थिक स्थिति मजबूत होए हे अऊ ओ मन ल एखर से रोजगार घलोक मिलत हे । एखर से आज वो मन सम्मान के संग अपन जीवन व्यतीत करत हें।
महामाया स्व-सहायता समूह पतोरा के अध्यक्ष श्रीमती जागृति साहू अउ सचिव श्रीमती शारदा ठाकुर ल ये सुग्‍घर काम बर छत्तीसगढ़ शासन कोति ले रायपुर म आयोजित ‘‘आउटलूक स्पीकआउट छत्तीसगढ़‘‘ कार्यक्रम म मुख्यमंत्री श्री भूपेश बघेल ह सम्मानित करे हे।
ए मन ल बिहान योजना के अन्तर्गत चक्रीय निधि के राशि 15 हजार रूपिया मिल गे हे। राष्ट्रीय ग्रामीण आजीविका मिशन बिहान के कर्मचारी मन ह समूह ल मशरुम उत्पादन बर प्रेरित करे रहिन। आज तक ये समूह ह कुल 02 ग्राम पंचायत के 10 स्व-सहायता समूह ल मशरुम उत्पादन के प्रशिक्षण घलोक दे डरे हें, ये प्रकार ले ये समूह मास्टर ट्रेनर के रुप म घलोक उभरत हे अऊ महामाया स्व-सहायता समूह दूसर समूह मन ल ग्राम पंचायत स्तर म ही रोजगार बर प्रेरित करके आदर्श समूह के परिचायक बनत हे।