रायपुर 20 जनवरी 2021। मंत्रालय महानदी भवन नवा रायपुर म प्रवेश बर सामान्य प्रशासन विभाग ह नवा दिशा-निर्देश जारी करे हे। जारी निर्देश के मुताबिक पहिली कोविड-19 के संक्रमण के रोकथाम अऊ नियंत्रण बर मंत्रालय म कोनो बाहरी मनखे के प्रवेश पूरा प्रतिबंधित करे गए रहिस। अत्यावश्यक प्रकरण मन म ही विभागीय सचिव के अनुमति ले प्रवेश के निर्देश जारी रहिस।
अब काबर के मंत्रालय म अधिकारी-कर्मचारी के शत-प्रतिशत उपस्थिति के संग काम पूरा संचालित होए लगे हे। ते खातिर काम के सुविधा ल ध्यान म रखत मंत्रालय म प्रवेश बर अब, अइसन मनखे जेकर तिर मंत्रालय सुरक्षा कार्यालय ले जारी वैध स्थायी अऊ अस्थायी प्रवेश-पत्र हे, ओ मन ल प्रवेश के अनुमति होही। जऊन मनखे कोनो शासकीय काम या विभागीय काम ले मंत्रालय म प्रवेश करना चाहत हें ओ मन ल विभागीय सचिव के अनुमति ले ही मंत्रालय म प्रवेश देहे जाही।
अइसनहे मंत्रालय म आगंतुक अऊ जन सामान्य जऊन बैठक, निजी काम अऊ सौजन्य भेंट करे बर मंत्रालय म प्रवेश चाहत हें ओ मन ल पहिली जइसे मंत्रालय के सुरक्षा कार्यालय ले जारी करे गए दैनिक पास के माध्यम ले ही प्रवेश के अनुमति देहे जाही। जेखर सेती सबो आगंतुक मन ले अपेक्षा करे जात हे के ओ मन मंत्रालय म प्रवेश बर निर्देशानुसार नियम मन के पालन करत कोविड-19 संक्रमण के रोकथाम अऊ नियंत्रण ल ध्यान म रखत रखत मंत्रालय म प्रवेश करत समय सेनीटाइजर अऊ मास्क के उपयोग करव अऊ सोशल डिस्टेंसिंग के पालन अनिवार्य रूप ले करव। मंत्रालय के अंदर बिना मास्क के पाए अऊ निर्देश के उल्लंघन करे म जारी करे गए प्रवेश पत्र निरस्त कर दे जाही। सामान्य प्रशासन विभाग कोति ले दिशा-निर्देश के संबंध म मंत्रालय म सबो अपर मुख्य सचिव, प्रमुख सचिव, सचिव अऊ विशेष सचिव संग जम्मो निज सचिव अऊ निज सहायक माननीय मंत्रीगण अऊ मुख्य सुरक्षा अधिकारी मंत्रालय ल पत्र प्रेषित कर देहे गए हे।
मंत्रालय जाए बर सामान्य प्रशासन ह जारी करिस नवा हुकुम
