इंजीनियर मन के टीम हर हफ़्ता करही काम, महानदी म बनही समन्वय के नवा ढाँचा
नई दिल्ली, छत्तीसगढ़ के महानदी के पानी खातिर ओडिशा अउ छत्तीसगढ़ के बीच लंबा समय ले विवाद चलत हे। ए लंबा विवाद ल बातचीत ले हल करे खातिर 30 अगस्त 2025 के नई दिल्ली म एक अहम बैठक होइस। ये मां छत्तीसगढ़ अऊ ओडिशा के मुख्य सचिव अऊ जल संसाधन विभाग के सचिव मन ह भाग लीन। बैठक म दुनों राज्य मन ह मानिन के ये समस्या बहुत जुन्ना अऊ कठिन हे, फेर मनखे मन अऊ दुनों राज्य मन के भलाइ खातिर एकर समाधान मिल-बैठके निकालना ही होही।
बैठक म ये घलोक तय होइस के सितंबर 2025 ले दुनों राज्य मन के तकनीकी समिति, जेमें इंजीनियर अऊ विशेषज्ञ होहीं, हर हफ़्ता बैठक करही। ये समिति मन मुख्य मुद्दा के चिन्हारी करही अऊ ओखर हल निकाले के कोसिस करही। संगेच, ओ मन ये घलोक देखहीं के कइसे दुनों राज्य मन के बीच बेहतर तालमेल बनाय जा सकही।
अकटूबर 2025 म दुनों राज्य मन के मुख्य सचिव एक अऊ बैठक करहीं। ये मां जल संसाधन सचिव घलोक सामिल होही। कहूं सब कुछ ठीक रहिस, त दिसंबर तक दुनों राज्य मन के मुख्यमंत्री घलोक मुलाक़ात कर सकत हें अऊ आगू के दिशा तय करहीं।
आखरी म दुनों राज्य मन ह ये वादा करिन के ओ मन ईमानदारी अऊ खुला मन ले बातचीत करही, ताकि महानदी जल विवाद के हल अइसन निकलय जेन सब बर लाभकारी होवय।
खांटी जानकार मन के मानना हे के कहूं ये पहल सफल रइही, त ये सिरिफ ओडिशा अऊ छत्तीसगढ़ बर ही न ही, बल्कि पूरा देश बर एक मिसाल होही के बड़रा अऊ जुन्ना विवाद घलोक आपसी बातचीत अऊ सहयोग ले सुलझाए जा सकत हे।
महानदी जल विवाद सुलझाए खातिर छत्तीसगढ़ अऊ ओडिशा ह शुरू करिस गोठ-बात
