रायपुर 16 फरवरी 2020। हॉकी के नर्सरी संस्कारधानी राजनांदगांव म पाछू सनिवार के दिन महंत राजा सर्वेश्वरदास स्मृति अखिल भारतीय हॉकी प्रतियोगिता के कृषि अउ जल संसाधन मंत्री श्री रविन्द्र चौबे ह शुभारंभ करिन। प्रतियोगिता 24 फरवरी तक अंतर्राष्ट्रीय एस्ट्रोटर्फ हॉकी स्टेडियम म चलही। ये मां देश के 20 चुनिंदा टीम हिस्सा लेवत हे। उद्घाटन मैच मध्यप्रदेश हॉकी एकेडमी भोपाल अऊ दिल्ली इलेवन गाजियाबाद के बीच खेले गीस।
प्रतियोगिता के शुभारंभ समारोह के मुख्य अतिथि कृषि मंत्री श्री रविन्द्र चौबे ह अपन उद्बोधन म कहिन कि हॉकी राजनांदगांव के पहिचान हे। क्रिकेट अऊ फुटबाल के विश्वव्यापी लोकप्रियता के ये जमाना म घलोक, राजनांदगांव म जनता के सहयोग ले महंत राजा सर्वेश्वरदास के स्मृति म, हर साल होवइया हॉकी प्रतियोगिता के परंपरा ल जीवित रखे अऊ संजोने के काम करे हें। ये प्रतियोगिता राजनांदगांव के विरासत बन गए हे। श्री चौबे ह कहिन कि ये प्रतियोगिता ल देखे बर जब जब मोला मौका मिलथे, मैं हर पइत राजनांदगांव आथंव। इहां आके राष्ट्रीय अऊ अंतर्राष्ट्रीय खिलाड़ी मन के प्रतिभा ल देखे के सौभाग्य प्राप्त होथे। ये प्रतियोगिता ल प्रसिद्धि के ऊंचाई म पहुंचाए बर प्रदेश सरकार हर संभव सहयोग करही। कृषि मंत्री ह कहिन कि प्रदेश सरकार ह छत्तीसगढ़ ल खेल के क्षेत्र म घलोक शिखर तक पहुंचाए बर खेल प्राधिकरण के गठन करे हे। प्राधिकरण के संग खेल प्रतियोगिता अऊ खिलाड़ी मन ल बढ़ावा मिलही। एखर बर व्यापक कार्य योजना बनाय जात हे।
