मुख्यमंत्री सामिल होइन महाप्रभु जगन्नाथ के रथ यात्रा म

रायपुर, मुख्यमंत्री श्री भूपेश बघेल अऊ पूर्व मुख्यमंत्री डॉ. रमन सिंह ह आज इहां गायत्री नगर स्थित जगन्नाथ मंदिर म छेरापहरा के रस्म पूरा करके सोना के बहिरी ले बहारी लगाके रथ यात्रा के शुरुआत करिन। श्रीमंदिर ले महाप्रभु जगन्नाथ, ऊंखर बड़े भाई बलभद्र अऊ बहन सुभद्रा ल पहांडी यात्रा करत रथ तक लाये गीस । मुख्यमंत्री श्री बघेल ह महाप्रभु के आरती करिन।

मुख्यमंत्री एखर पहिली श्रीमंदिर के यज्ञ शाला के अनुष्ठान म सामिल होइन अऊ श्रीमंदिर म पूजा-अर्चना करके प्रदेशवासी मन के सुख, समृद्धि अऊ खुशहाली अऊ प्रदेश म अच्छा बरसा के कामना करिन। ये बेरा म राजस्व मंत्री श्री जय सिंह अग्रवाल, विधायक सर्वश्री कुलदीप जुनेजा, बृजमोहन अग्रवाल, नेता प्रतिपक्ष श्री धरमलाल कौशिक, पूर्व विधानसभा अध्यक्ष श्री गौरी शंकर अग्रवाल, नगर निगम रायपुर के महापौर श्री प्रमोद दुबे संग श्रद्धालु बड़ संख्या म उपस्थित रहिन।