झरना, डेरहीन ल मिलीस 5 लाख तक इलाज के गारंटी
त्रिवेणी, सावित्री ल पानी भरे बर अब दूरिहा नइ जाना परय
ज्योति अऊ पुन्नी के पूरा होइस पक्का घर के सपना
महासमुंद, १८ जनवरी २०२४। विकसित भारत संकल्प यात्रा ले मनखे मन के सपना साकार होवत हे। यात्रा के समय लगाए गए शिविर म बड़ संख्या म ग्रामीण जन, महिला, युवा, संग अइसन हितग्राही जेन पात्र हे अऊ ओ मन ल योजना ले लाभ मिलने के उम्मीद हे ऊंखर मन के उम्मीद घलोक पूरा होवत हे। महासमुंद जिला म अभी तक 377 ग्राम पंचायत मन म संकल्प यात्रा शिविर के आयोजन करे गए हे। यात्रा के समय हितग्राही मन पूरा उछाह ले अपन ल मिले लाभ के जानकारी “मेरी कहानी मेरी जुबानी“ के रूप म साझा करत हें। ग्राम खैरझिटी के श्रीमती कुसुमलता चेलक अउ श्रीमती जानकी कोसले ह शासन के योजना मन ले मिले लाभ अऊ अपन जीवन म आए बदलाव के बार म बताइन। उमन बताइन कि उज्ज्वला योजना के अंतर्गत गैस कनेक्शन मिले ले ओ मन ल चूलहा के धुंगिया ले मुक्ति मिले हे अउ उखंर रंधनी के भिथिया अब धुगिया ले करियाए के जगा उजरा गए हे। अइसनहे विचार भुनेश्वरी कोसले अउ लता चंद्राकर ह घलोक व्यक्त करिन। ग्राम साराडीह म उज्ज्वला गैस ले लाभान्वित श्रीमती सुशीला साहू ह बताइस कि ए कैम्प म मोला उज्ज्वला गैस कनेक्शन मिलिस। जेमां एक सिलेंडर, चूल्हा, पाईप आदि सामिल हे। अब मोला लकड़ी अऊ धुगिया ले मुक्ति मिलही। बेलटुकरी शिविर म उषाबाई ह बताइस कि जब ले उज्ज्वला योजना अंतर्गत गैस मिले हे तब ले जल्दी खाना बन जाथे अउ समय अऊ श्रम के बचत होवत हे।
ग्राम साराडीह के श्रीमती झरना साहू ह बताइस कि ओ ल आयुष्मान कार्ड ले एक लाख 50 हजार रुपिया के निःशुल्क स्वास्थ्य लाभ मिले हे। वो ह बताइस कि डिलीवरी के समय विषम हालत के कारण स्वास्थ्यगत समस्या के सामना करना परे रहिस। ए बेरा म डॉक्टर ह बताइस कि इलाज म लगभग डेढ़ लाख रुपिया खरचा होही। अइसन समय म आयुष्मान कार्ड के लाभ मिलीस। कहूं ओ हालत म आयुष्मान कार्ड नइ होतिस त शायद मोर इलाज सम्भव नइ रहिस। कार्ड के माध्यम ले ही निःशुल्क उपचार के बाद मोला अऊ मोर बेटी ल नवा जिनगी मिलीस। आज में अपन गुड़िया के संग अड़बड़ खुश हंव। अइसनहे ग्राम बेलटुकरी म डेरहिन कोशले ह बताइस कि वोला पहिली डिलिवरी बर निजी अस्पताल जाना परत रहिस फेर आयुष्मान कार्ड होए के सेती निःशुल्क उपचार हो गे। एखर से मोला बहुत सहायता मिलीस।
मेरी कहानी मेरी जुबानी अंतर्गत ज्योति निर्मलकर ह प्रधानमंत्री आवास योजना के तहत बने घर के जानकारी देवत कहिस कि ये घर हम जइसे गरीब परिवार बर एक सपना रहिस। हम जइसे गरीब मन के सपना मोदी सरकार ह पूरा करे हे। अइसनहे साराडीह शिविर म प्रधानमंत्री आवास योजना अंतर्गत ईश्वर यादव, पुन्नी यादव अउ भीष्मति साहू ह मेरी कहानी मेरी जुबानी म अपन विचार रखिन।
साराडीह शिविर म जल जीवन मिशन के तहत हर घर नल कनेक्शन के हितग्राही त्रिवेणी, सावित्री ह अपन अनुभव साझा करत कहिन कि नल के समस्या हमार बर बहुतेच तकलीफ दायक रहिस। हमला पानी बर बहुत दूरिहा जाना परत रहिस। कई पइत उहां भीड़ के सेती झगरा के नौबत आ जात रहिस। अब हर घर नल कनेक्शन ले हम ए समस्या ले छुटकारा पाए हन। हमार अंगनेच म नल ले पानी अब मिलत हे अब हम खुश हन। अइसनहे बेलटुकरी शिविर म नल जल योजना के बारे म लक्ष्मी चंद्राकर अऊ राधा साहू मन ह कहिन कि अब शुद्ध पेयजल सपना नइ रहिस अब घर म लगे नल ले ही पानी मिलत हे।
कांपा गांव म प्रधान मंत्री सम्मान निधि योजना ले लाभान्वित किसान श्री मिलन साहू ह बताइस कि ओ ल अब तक 15 किस्त के राशि मिले हे। एखर से वोला किसानी काम म काफी सहयोग मिलीस। मेरी कहानी मेरी जुबानी अंतर्गत लमकेनी समूह के मानमोती ह बताइस कि ओ मन ल हर महिना लगभग 12 ले 15 हजार रुपिया के आमदनी होथे। बैंक ले ओ मन ल एक लाख रुपिया के करजा घलोक मिले हे। अइसनहे बेलटुकरी म महिला समूह के ज्ञान बाई ह बताइस कि ओखर समूह 3 लाख रुपिया के लोन लेके टेंट अऊ सब्जी बाड़ी के अपन काम शुरू करे हे। आज ओ मन स्वावलंबी हे। इही तरा विकसित भारत संकल्प यात्रा ले मनखे मन के सपना साकार होवत हे।
