बागबाहरा ब्लॉक के अनुपा ठाकुर ह करिस आंगनबाड़ी केंद्र के सुंदर बदलाव, बनीस चेम्पियन आफ चेंज

महासमुंद, 16 फरवरी 2024। निर्मल आंगनबाड़ी अभियान अंतर्गत उत्कृष्ट काम करत आंगनबाड़ी केंद्र ल आदर्श स्वरूप प्रदान करइया बागबाहरा विकासखंड के आंगनबाड़ी केंद्र बागबाहरा कला के कार्यकर्ता श्रीमती अनुपा ठाकुर अपन काम ले आन कार्यकता मन बर मिसाल बन गए हे। चर्चा के समय वो ह खुसी के संग बताइस कि पीरामल टीम अउ परियोजना अधिकारी से आंगनबाड़ी कार्यकर्ता के सेक्टर बैठक के समय निर्मल आंगनबाड़ी अभियान कार्यक्रम के बारे म जानकारी प्राप्त करके बहुत अच्छा लगीस। कार्यशाला ले वापस आके मैं ह एखर बारे म विचार करेंव कि मोला घलोक अपन आंगनबाड़ी ल बहुतेच सुंदर बनाना हे जेन कि अंदर ले तो सुंदर रहय ही संगेच बाहिर ले देखतेच सबो बर आकर्षक हो जाय। काबर कि मोला साज-सज्जा के जिनिस बनाना, चित्रकला, पेंटिंग ये सबो चीजे हमेशा ले ही पसंद रहिस ते पाए के मैं ह सोचेच के काबर न सबो मनखे मिलके आंगनबाड़ी के पुताई करन अऊ आंगनबाड़ी ल आकर्षक बनावन। एखर बर मैं अपन पइसा के उपयोग करत आंगनबाड़ी केंद्र के पुताई करवाएंव अऊ ए संबंध म सहायिका, सरपंच अऊ बच्चां के परिजन मन ले चर्चा करेंव, सबो ल मोर विचार अच्छा लगीस। सबो एक संग मिलके आंगनबाड़ी के पुताई करेन। जेमां मोर संग सहायिका श्रीमती कुन्नी बाई ठाकुर, सरपंच श्रीमती प्रीति सोनवानी, समुदाय के सदस्य भावना पटेल, मंटोरा, लकीर वर्मा सामिल रहिन।
आंगनबाड़ी के रंगरोगन के बाद मैं ह देखेंव के सबो के चेहरा म खुशी रहिस। सबके कहना रहिस के एखर से सुंदर आंगनबाड़ी पहिली नइ देखे रहेन अऊ हमन एला सुंदर बनाए म योगदान देहे हन ए खुशी हम शब्द म बया नइ कर सकन। ये सुनतेच मोर म आत्मविश्वास जागीस कि एखर पहल ले बदलाव के दिशा मिल सकत हे।
निर्मल आंगनबाड़ी अभियान ह मोला एक नवा मोड़ दीस जेखर से मोर म अभिलाषा जागीस कि में अपन आंगनबाड़ी ल रंगरोगन करके सुंदर स्वरूप दंव अऊ सबो लइका मन बर सुंदर वातावरण के निर्माण करंव जेखर से लइका मन खुशी ले आंगनबाड़ी म प्रवेश करयं। सरपंच ह अवलोकन के समय बताइस कि उमन उंखर बेटी के माध्यम ले घलोक सामुदायिक अभियान के प्रभाव ल महसूस करीस, वोखर नोनी ह बताइस कि ओखर आंगनबाड़ी अब सुंदर दिखत हे जेखर प्रभाव ओ नोनी ले सुने ल मिलीस।