महासमुंद, स्वामी आत्मानंद शासकीय इंग्लिश स्कूल नयापारा महासमुन्द के कक्षा 11 वीं मैथ्स के छात्रा कुमारी रितिका ध्रुव के प्रोजेक्ट के चयन इसरो बर होए हे। ग्रामीण अंचल के आदिवासी बालिका रितिका के रूचि विज्ञान के प्रति बचपन ले ही रहिस। वोकर पिता देवसिंग ध्रुव महासमुन्द जिला के गुड़रूडीह (सिरपुर ) के रहइया ये। देवसिंग ध्रुव के तुमगांव म साईकिल रिपेयरिंग के दुकान हे। रितिका के माता सरोज ध्रुव गृहिणी हे। स्वामी आत्मानंद इंग्लिश स्कूल नयापारा महासमुन्द के प्राचार्या अमी रूफस, विज्ञान के शिक्षक मितेश शर्मा, विकास यादव अउ प्रमोद कन्नौजे के मार्गदर्शन म छात्रा रितिका ह अपन ये अभियान ल पूरा करे हे।
जानबा हे कि रितिका ध्रुव जब 8 वीं कक्षा म पढ़त रहिस तभे ले वोखर रुचि विज्ञान के प्रति जागृत होइस अऊ वो विज्ञान ले संबंधित गतिविधि मन म हिस्सा लेहे लगिस। विज्ञान से संबंधित अंतरिक्ष प्रश्नोत्तरी प्रतियोगिता म हिस्सा लीस। इही बीच इसरो ह प्रोजेक्ट बर आवेदन आमंत्रित करिस। रितिका ह इसरो के निरधारित प्रारूप म आवेदन भरके अपन प्रोजेक्ट बनाईस। ये प्रोजेक्ट बर देश भर ले छै स्कूली पढ़ईया लईका मन के चयन करे गए हे, जेमां छत्तीसगढ़ ले एक मात्र छात्रा रितिका ध्रुव के चयन होए हे। इही कड़ी म रितिका ध्रुव प्रशिक्षण बर दिनांक 1 अकटूबर ले 6 अकटूबर तक सतीश धवन स्पेस सेंटर श्री हरिकोटा आंध्र प्रदेश म प्रशिक्षण लेवत हे। अगले चरण के प्रशिक्षण बर वो ह नवम्बर महिना म बेंगलुरू इसरो म क्षुद्रग्रह प्रशिक्षण शिविर म हिस्सा लेही।
महासमुंद : स्वामी आत्मानंद शासकीय इंग्लिश स्कूल नयापारा महासमुन्द के छात्रा रितिका ध्रुव के चयन इसरो बर
