कुमारी चंद्राकर ह गोंदा फूल के खेती ले कमाइस एकड़ पाछु दू लाख ले जादा, राष्ट्रीय बागवानी मिशन ले मिलिस पंदोली

CHHATTISGARHI NEWS: महासमुंद, जिला के बागबाहरा विकासखंड के भदरसी गांव के किसान कुमारी चंद्राकर पारंपरिक खेती ले आगू बढ़ के उद्यानिकी फसल मन ल अपना के अपन किस्मत ल बदल डारे हवय। राष्ट्रीय बागवानी मिशन के सहयोग ले गोंदा फूल के खेती करके ओ ह एकड़ पाछु अंदाजन 2 लाख 7 हजार रूपिया के शुद्ध कमई करे हवय।
​किसानी करइया कुमारी चंद्राकर तीर कुल 0.64 हेक्टेयर सिंचित किसानी भुइंया हे। धान के खेती म ज्यादा लागत अउ कम मुनाफा ल देखत ओ ह उद्यानिकी फसल मन के रद्दा धरे हवय। बछर 2025-26 म राष्ट्रीय बागवानी मिशन के अंतर्गत पुष्प क्षेत्र विस्तार घटक ले वो ह गेंदा फूल के खेती ल अपनाइस। ये योजना के तहत 0.64 हेक्टेयर रकबा म गेंदा फसल बर ओ ल 12 हजार 800 रूपिया के अनुदान डीबीटी के माध्यम से मिलिस।
​कुमारी चंद्राकर बताथे के ओ ह आधुनिक तकनीक, ड्रिप सिंचाई अउ किसानी के नवा औजार मन के उपयोग करके गोंदा फूल के खेती करिस। बढ़िया प्रबंधन अउ वैज्ञानिक तरीका ले खेती करे के सेती ओ ल बंपर मुनाफा मिलिस। एखर संगे-संग ओ ह धनियां, कांदा, भाँटा, मुरई अउ भाजी संग अलग-अलग उद्यानिकी फसल मन के खेती तको करत हावय।
​कुमारी चंद्राकर के ये सफलता अब आसपास के किसानी करइया मन बर घलो बड़का प्रेरणा बनत हवय। ओखर ये शानदार खेती ल देख के लागमानी मन अउ क्षेत्र के दूसर किसान मन म घलो उद्यानिकी फसल मन ल अपनाए के प्रति गहिर रूचि बाढ़त हवय, जेकर से ग्रामीण अंचल मन म किसानी के सूरत बदलत हवय।