बिहान दीदी मन ह फेंसिंग तार बनाके कमाइन एक लाख 90 हजार रुपिया
महासमुंद, 18 फरवरी 2021। मजबूत इच्छा शक्ति अऊ अपन फौलादी इरादा ले महिला मन पुरूष मन बर आरक्षित समझे जाए वाले व्यवसायिक क्षेत्र मन म घलोक सफल होवत हें। एखर मिसाल महासमुंद जिला के विकासखंड बागबाहरा के छोटे से गाँव कोमाखान के एकता महिला स्व-सहायता समूह के महिला मन हे, जिंकर जज्बा के आगू अब लोहा घलोक नरम पर गए हे। बिहान समूह ले जुड़े ये महिला मन लोहा के तार फेंसिंग के निर्माण करत हें जेला भारी काम होए के सेती आम तौर म पुरूष ही करत रहिस। ए महिला मन अब तक 169 बण्डल फेंसिंग तार के निर्माण करके ओला 1 लाख 90 हजार 365 रुपए म बेंच तको डरे हें। इंकर फेंसिंग तार के सरकारी अऊ गैर सरकारी संस्था मन कोति ले सरलग माँग हे।
महिला मन के बताती ये काम मुश्किल तो रहिस फेर ग्रामीण आजीविका मिशन के मास्टर ट्रेनर जब प्रशिक्षण दीस त ये काम आसान लगे लगिस। समूह के महिला मन ह साबित कर दीन के ऊंखर भीतर आगू बढ़े अऊ अपन परिवार ल आगू ले जाय के पूरा क्षमता हे। अइसन म बिहान के योजना मन उमन ल अऊ मजबूत करत हें। ये महिला मन न सिरिफ अपन परिवार के आर्थिक स्थिति ल मजबूत करत हें भलुक दूसर मन ल रोजगार तको प्रदान करके ओ मन ल आगू बढ़े म मदद करत हें। समूह के महिला मन फेसिंग तार के संग आचार, पापड़, निरमा, साबुन, फिनाइल घलोक बनावत हें।
इहां ये बताना जरूरी हे के छत्तीसगढ़ राज्य ग्रामीण आजीविका मिशन के तहत ग्रामीण क्षेत्र म निवास करत महिला अऊ युवति मन ल स्व-सहायता समूह के रूप म सकेल के ओ मन ल स्वावलंबन बर प्रेरित करे जात हे। एखर संगेच ओ मन ल कई ठन आजीविका संबंधित गतिविधि मन के प्रशिक्षण देके स्वरोजगार ले जोड़े जात हे। एखर तहत महासमुंद जिला म 5 हजार 223 महिला स्व-सहायता समूह काम करत हे। एखर से जुडके करीबन 55 हजार 910 महिला मन मोमबत्ती, दीया, वाशिंग पाउडर, फिनायल, बांस के टोकरी संग आन सामान बनाके आत्मनिर्भर बनत हें। बिहान योजना ले जुड़े महिला मन सिलाई-कढ़ाई करे, जैविक खाद बनाए अऊ अपन बनाए सामान मन ल बजार म बेचे के घलोक काम करत हें, ये मा राज्य सरकार कोति ले घलोक पूरा सहयोग करे जात हे।
