शासन के मिनीमाता महतारी जतन योजना ले अभिभावक मन ल मिलत हे आर्थिक सहायता

रायगढ़, शासन कोति ले लइका मन के देखभाल अऊ स्वास्थ्य ल ध्यान रखे खातिर कई ठन विभाग मन के माध्यम ले कई योजना संचालित करे जात हे। इही कड़ी म श्रम विभाग कोति ले मिनीमाता महतारी जतन योजना के तहत आर्थिक रूप ले कमजोर परिवार वर्ग के मनखे मन के लइका मन के पोषण अऊ देखभाल बर एकमुश्त राशि प्रदान करे जात हे। जेखर से कामगार परिवार ल काफी सहूलियत मिलत हे।
ये योजना म पंजीकृत महिला निर्माण श्रमिक मन ल प्रसूति सहायता राशि के रूप म 20 हजार रूपिया एकमुश्त देहे के प्रावधान हे। ये राशि महिला श्रमिक मन ल लइका के जन्म के बाद देहे जात हे। ये योजना के लाभ पहिली दू लइका मन के प्रसव बर देहे जाथे। योजना के लाभ मिले ले आर्थिक रूप ले कमजोर वर्ग ल काफी मदद मिलत हे। आय बर रोजी मजदूरी उपर निर्भर रहइया श्रमिक मन बर शासन के ये योजना लाभदायक के संग अकतहा आय के जरिया हे, जेखर से पालक अपन लइका मन के देखभाल के अलावा ओ राशि के उपयोग ऊंखर भविष्य सुरक्षित रखे बर करत हें।
विकासखंड पुसौर ग्राम डीपापारा बोन्दा निवासी श्री रीता निषाद पति श्री वीरेंद्र ह बताइस के ओ ल मिनी महतारी जतन योजना के लाभ मिले हे। योजना ले मिले पइसा ल लइका के भविष्य बर एफडी करे गए हे। ये योजना कमजोर वर्ग बर आर्थिक रूप ले सहायता प्रदान करथे। ग्राम मचगोढ़ा निवासी श्रीमती प्रेम कुमारी ह बताइस के वोखर पति श्री हरि राम चंद्रा खेती-किसानी के काम करथे। शासन के महतारी जतन योजना के लाभ ओ ल मिले हे। वो ह मिले राशि ल बैंक म सुरक्षित रखे हे, ताकि आगू चलके ऊंखर लइका के काम आ सकय। उमन शासन के ये योजना ल बहुत लाभदायक बतात मुख्यमंत्री श्री भूपेश बघेल ल अपन धन्यवाद ज्ञापित करे हें।