- छत्तीसगढ़ महतारी दुलार योजना कोविड ले अनाथ होए लइका मन ल देही संरक्षण
- अइसे लइका जिंकर परिवार म कमइया सदस्य के मृत्यु हो गए हे, उंखर पढ़ाई के जिम्मा घलोक उठाही राज्य सरकार
- स्वामी आत्मानंद इंग्लिश मीडियम स्कूल मन म प्रवेश म मिलही अइसन लइका मन ल प्राथमिकता; नइ लेहे जाय उंखर से कोनो फीस
- मुख्यमंत्री श्री भूपेश बघेल के संवेदनशील पहल ले बेसहारा लइका मन के संवरही सुघ्घर भविष्य
रायपुर, 13 मई 2021। कोविड के खिलाफ लड़ाई के समय छत्तीसगढ़ सरकार ह एक अइसन निर्णय लेहे हे जेन कोविड पीड़ित मन के थोकुन आंसू पोंछ सकही। कोविड के निरदई मार के चलते जेन लइका मन के सब कुछ लुट गए हे, अब छत्तीसगढ़ सरकार उंखर संबल बनइया हे, अऊ न केवल उंखर शिक्षा के दायित्व उठाही भलुक ऊंखर भविष्य ल संवारे के हर संभव कोसिस घलोक करही। सरकार के ए संवेदनशील पहल ल अमली जामा पहिराही छत्तीसगढ़ महतारी दुलार योजना के माध्यम ले। ये योजना ए वित्तीय साल ले लागू करे जाही।
अइसे लइका जे मन अपन माता-पिता ल ए वित्तीय साल के समय कोरोना के सेती खो देहे हे, उंकर पढ़ई के पूरा खरचा अब छत्तीसगढ़ सरकार उठाही। संगेच पहिली ले आठवीं तक के अइसन लइका मन ल 500 रुपिया हर महीना अऊ 9 वीं ले 12 वीं तक के लइका मन ल 1000 रुपिया हर महीना के छात्रवृत्ति घलोक राज्य सरकार कोति ले देहे जाही।
एखरे संगेच राज्य सरकार कोति ले ये घलोक निर्णय ले गए हे के, अइसन लइका जिंकर परिवार म रोजी-रोटी कमईया मुख्य सदस्य के मृत्यु कोरोना ले होए हे, त उन लइका मन के पढ़ई के व्यवस्था घलोक राज्य सरकार कोति ले करे जाही। राज्य सरकार कोति ले ये घलोक निर्णय ले गए हे के कहूं ये लइका राज्य के स्वामी आत्मानंद इंग्लिश मीडियम स्कूल मन म प्रवेश बर आवेदन देहीं त ओ मन ल प्राथमिकता ले प्रवेश देहे जाही अऊ उंखर से कोनो प्रकार के फीस नइ लेहे जाए।
कोरोना महामारी ह न जाने कतका घर मन म अंधियार कर देहे हे अऊ न जाने कतको लइका मन के मूड़ ले ऊंखर मा-बाप के सहारा छीना गए हे। मुख्यमंत्री श्री भूपेश बघेल के नेतृत्व म छत्तीसगढ़ सरकार कोति ले जरूरतमंद मन ल हर प्रकार के सहारा मुहैया कराए जात हे। मुख्यमंत्री के ये संवदेनशील पहल ए बेसहारा लइका मन के बेहतर भविष्य निर्माण म अड़वड़ सहायक होही।
