महिला मन ल ऊंखर अधिकार अऊ कानून मन के प्रति जागरूक करे राज्य महिला आयोग के नवा पहल
मुख्यमंत्री श्री भूपेश बघेल हरियर झंडी देखा के महतारी न्याय रथ ल करहीं रवाना
रायपुर, छत्तीसगढ़ राज्य महिला आयोग के पहल म हरेली पर्व ले प्रदेश के महिला मन ल ऊंखर संवैधानिक अधिकार अऊ कानून मन के जानकारी देके जागरूक करे अऊ उंमन म आत्मविश्वास बढ़ाए के उद्देश्य ले मुख्यमंत्री महतारी न्याय रथ यात्रा के शुरूआत करे जाही। मुख्यमंत्री श्री भूपेश बघेल हरेली के दिन मुख्यमंत्री महतारी न्याय रथ ल हरियर झंडी देखा के रवाना करहीं। ये रथ सबो जिला मन म घूम के मनखे मन ल शॉर्ट फिल्म, संदेश अऊ ब्रोशर के माध्यम ले महिला मन के कानूनी प्रावधान अऊ ऊंखर संवैधानिक अधिकार मन के बारे म अवगत कराही।
मुख्यमंत्री महतारी न्याय रथ यात्रा राज्य महिला आयोग के माध्यम ले संचालित करे जाही। हर एक महतारी न्याय रथ म 2 अधिवक्ता घलोक होही, जेन महिला मन के समस्या मन ल सुनके ओ मन ल जानकारी अऊ सलाह देंहीं। न्याय रथ के माध्यम ले महिला मन आवेदन घलोक दे सकहीं, जेखर से महिला आयोग कोति ले उंखर समस्या मन के निराकरण करे जा सकय। एमा एक बड़का एलईडी स्क्रीन होही, जेमां छत्तीसगढ़ी अऊ हिंदी भाखा म कई ठन कानून मन ले संबंधित राष्ट्रीय स्तर म पुरस्कृत छोटे फिल्म देखाए जाही। महतारी न्याय रथ के संचालक बर प्रदेश सरकार ह डीएमएफ पॉलिसी म विशेष रूप ले बदलाव करे हे। न्याय रथ के संचालन बर जिला ल मिलइया डीएमएफ राशि के उपयोग करे जाही।
राज्य महिला आयोग के अध्यक्ष डॉ. किरणमयी नायक ह बताइस कि शिक्षित, अशिक्षित, गृहणी, नौकरी करत सबो महिला मन ल महिला आयोग के काम अऊ महिला मन बर बनाय गए कानून, नियम मन अऊ ऊंखर अधिकार मन ल जानना बहुत जरूरी हे। एखर खातिर हरेली तिहार ले मुख्यमंत्री महतारी न्याय रथ के शुरूआत करे जात हे। ए महतारी न्याय रथ मन के माध्यम ले मनखे मन ल बताए जाही कि महिला मन अपन समस्या मन के समाधान बर अऊ निःशुल्क अऊ जल्दी न्याय पाय बर कइसे सरलता अऊ सुगमता ले महिला आयोग म आवेदन कर सकत हें। ये रथ शुरूआत म खनिज न्यास निधि प्राप्त करे वाले नौ जिला मन म पहिली जाही, ओखर बाद रथ प्रदेश के बाकी बचे जिला मन के भ्रमण म जाही।
श्रीमती नायक ह कहिन हे कि छत्तीसगढ़ के माता अऊ बहिनी मन ल सामाजिक, आर्थिक अऊ राजनीतिक रूप ले सशक्त बनाए बर बीते साढ़े तीन बछर म राज्य सरकार ह कई ठन स्तर म बहुत अकन योजना संचालित करे हे। हमर ए योजना मन के सफलता पूरा देश म उदाहरण बने हे। अब एक कदम अऊ बढ़ात एक अऊ नवा योजना के शुरुआत करे जात हे। ये योजना घलोक देश म अपन जइसे एकमात्र योजना होही। एखर से महिला मन जागरूक होहीं अऊ उंकर आत्मविश्वास बाढ़ही। महिला मन ल कानूनी अधिकार मन के जानकारी ले राज्य म महिला मन के संग होवइया अपराध म कमी आही।