विष्णु भैया के उपहार ले राखी के तिहार म मिलिस दुगुना खुसी, महतारी वंदन के 30वां किस्त ले बहिनी मन ला मिलिस संबल

बिलासपुर-रायगढ़, महतारी वंदन योजना ह छत्तीसगढ़ के महिला मन ला आर्थिक रूप ले सक्षम बनाय बर एक ठन बड़े सहारा साबित होवत हे। योजना के तहत हर महिना मिलइया पइसा ले महिला मन ला घरेलु जरूरत, लइका मन के पढ़ई-लिखई, दवाई-पानी अउ तिहार-बार के तियारी म बने मदद मिलत हे। रक्षाबंधन ले पहिली योजना के 30वां किस्त मिल जाय ले प्रदेश के बहिनी मन के खुसी अउ जादा बाढ़ गे हे। रायगढ़ के श्रीमती वृंदावती सिदार अउ बिलासपुर के श्रीमती सोनम साहू के गोठ-बात ए बात के परमान हे के कइसे ए पइसा ह महिला मन बर आर्थिक संबल के संग-संग आत्मविस्वास के आधार घलो बनत हे।
रायगढ़ के श्रीमती वृंदावती सिदार ह बताथें के महतारी वंदन योजना के तहत हर महिना मिलत पइसा ले उनला घर-गृहस्थी के जरूरी काम मन ला पूरा करे म भारी सहारा मिलथे। लइका मन के पढ़ई, दवई अउ घर के नान-मुन खरचा मन म ए पइसा ह लगातार काम आवत हे। ए बेर 30वां किस्त के पइसा ले उमन अपन भाई मन बर राखी बिसाए हवंय। उंखर कहना हे के रक्षाबंधन के दिन भाई के कलाई म राखी बांधत बखत ए योजना ले मिले आत्मनिर्भरता अउ मान-सम्मान के भाव घलो उंखर संग रहिही।

बिलासपुर के श्रीमती सोनम साहू बर घलो महतारी वंदन योजना के 30वां किस्त रक्षाबंधन ले पहिली खास खुसी लेके आइस। उमन बताइन के मिले पइसा ले उमन अपन भाई बर राखी बिसाय के संगे-संग तिहार के आने तैयारी घलो करहीं। उंखर कहना हे के तिहार ले पहिली खाता म पइसा आ जाय ले उंखर खुसी दुगुना होगे हे। उमन मुख्यमंत्री श्री विष्णु देव साय के आभार मानत कहिन के बहिनी मन बर रक्षाबंधन ले पहिली आर्थिक संबल मिलना कोनो उपहार ले कम नोहय।
श्रीमती वृंदावती अउ श्रीमती सोनम सही अइसने कतकोन महिला मन महतारी वंदन योजना के पइसा के उपयोग अपन अउ परिवार के जरूरत मन ला पूरा करे बर करत हवंय। हर महिना मिलइया ए आर्थिक मदद ले महिला मन के नान-मुन जरूरत खातिर दूसर ऊपर निरभरता कम होवत हे अउ परिवार के खरचा म हाथ बंटाय के मउका मिलत हे। एखर ले उंखर आत्मविस्वास अउ आर्थिक फैसला लेहे के छमता घलो मजबूत होवत हे।
दूनो महिला मन कहिन के महतारी वंदन योजना उंखर बर सिरिफ आर्थिक मदद नोहय, भलुक सम्मान, आत्मनिर्भरता अउ परिवार के जिम्मेदारी म भागीदारी के माध्यम बन गे हे। उमन महिला मन ला आर्थिक रूप ले मजबूत बनाय खातिर मुख्यमंत्री श्री विष्णु देव साय के प्रति आभार जतइन। रक्षाबंधन के मउका म मिले 30वां किस्त ह भाई-बहिनी के मया-पिरीत के ए तिहार ला अउ जादा खास बना दे हे।