महतारी वंदन योजना बनिस प्रदेश के महिला मन के मजबूत संबल, हर महिना के आर्थिक सहायता ले बदलिस जिंदगी

कबीरधाम, मुख्यमंत्री श्री विष्णु देव साय के अगुवई म महिला मन ल सशक्त, आत्मनिर्भर अऊ आर्थिक रूप ले सुरक्षित बनाए के उद्देश्य ले चालू करे गए महतारी वंदन योजना राज्यभर म सकारात्मक बदलाव लावत हे। योजना के तहत पात्र महिला मन ल हर महीना 1,000 रूपिया के निश्चित आर्थिक सहायता सीधा ऊंखर बैंक खाता म जमा करे जात हे,अब तक 14,306 करोड़ 33 लाख रूपिया के राशि 22 किश्त म ऊंखर बैंक खाता मन म पहुंचाए जा चुके हे। जेखर से घरेलू खरचा मन के उंखर चिंता कम हो गए हे अऊ महिला मन के आत्मविश्वास बाढ़े हे।
कबीरधाम जिला के ग्राम मझगांव के रहवइया श्रीमती सतरूपा गंधर्व ह ए योजना ले लाभान्वित होके आत्मविश्वास के संग जीवन यापन करत हे। वो ह मजदूरी करथे वोकर तीन लइका हे अउ वोला अब तक 22 किस्त म कुल 22,000 रूपिया के सहायता राशि मिल गए हे। ओ बताथे के ए पइसा ले लइका मन के पढ़ई, घरेलू जरूरत अऊ व्यक्तिगत आवश्यकता आसानी ले पूरा होवत हे। सरलग सहायता ले वोखर पास बचत घलोक रहे लगे हे, जेखर से उदुपहा खरचा मन के चिंता अब खतम हो गए हे।
बलरामपुर जिला के विकासखण्ड वाड्रफनगर अंतर्गत ग्राम रघुनाथनगर के रहवइया श्रीमती ओमलता घलोक महतारी वंदन योजना ले लाभान्वित होके स्वावलंबन के दिशा म आगू बढ़त हे। सादा किसान परिवार ले ताल्लुक रखइया श्रीमती ओमलता ल योजना के तहत हर महीना 1,000 रूपिया के सहायता मिलत हे। अब तक वोला  22,000 रूपिया के मिल गे हे। ओ बताथे के ए सहयोग ले ओ घर के छोटे-छोटे खरचा खुदे वहन कर पात हे अऊ कोनो उपर निर्भर नइ रहे ल परत हे। एखर से परिवार के आर्थिक स्थिति म घलोक सुधार आए हे।
महिला अऊ बाल विकास मंत्री श्रीमती लक्ष्मी राजवाड़े ह कहिस के महतारी वंदन योजना महिला मन के जीवन म स्थायित्व अऊ सम्मान लवइया उदीम ये। उमन बताइन के नियमित आर्थिक सहायता ले महिला मन अब अपन परिवार के जरूरत मन म सक्रिय भूमिका निभावत हें अऊ आर्थिक निर्णय मन म उंखर भागीदारी बाढ़े हे। मंत्री श्रीमती राजवाड़े ह अधिकारी मन ल निर्देश देहे हें के योजना के लाभ  हर एक पात्र महिला तक समयबद्ध अऊ पारदर्शी ढंग ले पहुंचय।