महतारी वंदन योजना ले पूर्णिमा के हाथ म आइस आर्थिक संबल, बाढि़स आत्मविश्वास

सरलग सहायता ले परिवार के जरूरत पूरा करना होइस असान

कबीरधाम, घर म काम-बुता करइया पूर्णिमा मानिकपुरी बर एक समय अइसन घलोक रहिस, जब घर के छोट-छोट जरूरत मन ल पूरा करना आसान नइ रहिस। परिवार के सीमित आय म लइका मन के पढ़ई, कॉपी-किताब, घरेलू सामान अऊ अचानक होवइया इलाज के खरचा के व्यवस्था करना कई पइत मुश्किल हो जात रहिस। कबीरधाम जिला के ग्राम जीताटोला के रहवइया पूर्णिमा ल अइसन म छोट-छोट जरूरत मन बर घलोक परिवार के आन सदस्य मन उपर निर्भर रहे ल परय। मुख्यमंत्री श्री विष्णुदेव साय के अगुवाई म संचालित महतारी वंदन योजना ह ऊंखर जीवन म एक नवा बदलाव लेके आइस। योजना के तहत हर महीना सीधा बैंक खाता म मिलइया एक हजार रुपिया के सहायता रासि ह ओ ल आर्थिक संबल भर न ही, बल्कि आत्मविश्वास अऊ आत्मनिर्भरता घलोक देहे हे। अब तक ओ ल 29 किस्त के माध्यम ले कुल 29 हजार रुपिया मिल गे हे।
पूर्णिमा बताथे के पहिली लइका मन के पढ़ई बर कॉपी-किताब बिसाना, घर के जरूरी सामान लाना या अचानक ओखद-पानी के जरूरत परे म पइसा के चिंता सताय लगत रहिस। फेर अब हर महीना मिलइया रासि ले ये सबो जरूरी काम समय म हो जात हे। एखर से परिवार के मासिक बजट घलोक संतुलित रहत हे अऊ आर्थिक दबाव काफी कम हो गे हे। ओ ह मुस्कावत कहत हे के अब मोला छोट-छोट जरूरत मन बर कोनो के आगू हाथ फैलाय के जरूरत नइ परय। लइका मन के पढ़ई हो, घर के जरूरी सामान हो या दवा के खर्च, हर महीना मिलइया ए रासि मोर परिवार बर बहुत बड़ सहारा बन गे हे। सबले बड़े खुशी ए हे के अब महूं परिवार के जिम्मेदारी मन म अपन भागीदारी निभा पात हंव।
पूर्णिमा मानिकपुरी ह बताइस के ए योजना ह ओ ल केवल आर्थिक सहायता भर नइ देहे हे, बल्कि अपन फैसला खुद करे के भरोसा घलोक देहे हे। अब ओखर तिर अपन जरूरत अऊ परिवार के जरूरत बर अपनेच दू पइसा रहिथे। एखर से ओखर आत्मसम्मान बाढ़े हे अऊ ओ लइका मन के छोट-छोट खुसी मन ल घलोक पूरा कर पात हे। ओ मुख्यमंत्री श्री विष्णुदेव साय के प्रति जस व्यक्त करत कहत हे के महतारी वंदन योजना महिला मन बर सम्मान अऊ आत्मनिर्भरता के नवा पहिचान बन गे हे। ए सहायता रासि हर महीना परिवार बर एक भरोसेमंद सहारा बनके आथे अऊ महिला मन ल आर्थिक रूप ले मजबूत बनाए म महत्वपूर्ण भूमिका निभावत हे।