नियमित आरथिक सहायता ले परिवार के जरूरत मन होवत हे पूरा, माइलोगन मन ला मिलत हे ससक्तीकरन के नवा अधार
सक्ती, माइलोगन मन ला आरथिक रूप ले मज़बूत अउ सुआलम्बी बनाए के उदेस्य ले प्रदेस सरकार कोति ले चलाय जात महतारी वंदन योजना जिला के हजारो माइलोगन मन के जीवन म सुघर बदलाव लावत हे। योजना के भितरी हर महीना मिलइया सहायता रासि माइलोगन मन ला आरथिक सहारा देहे के संगे-संग ओकर आत्मबिसवास ला घलो बढ़ावत हे। बिकासखंड सक्ती के भितरी के गांव किरारी के रहइया श्रीमती सुनीता श्रीवास एकर एक ठन सुघर मिसाल हें।
ओ ह बताथे के पहिली नान-नान जरूरत बर घलो ओ ला दूसर मन ऊपर निरभर रहे बर परत रहिस, फेर अब महतारी वंदन योजना ले मिलइया रासि ओकर बर बड़का सहारा बन गे हे। ए मदद ले ओ ह अपन रोज के खरचा मन ला पूरा करे के संगे-संग लइका मन के पालन-पोसन म घलो हाथ बटा पावत हे। श्रीमती सुनीता श्रीवास के कहे के मुताबिक योजना ले मिलइया सरलग आरथिक मदद ह ओ ला अपन खरचा के बढ़िया प्रबंधन करे म अउ परिवार के जरूरत मन ला पूरा करे म सक्षम बनाय हे।
ओकर मानना हे के ए योजना सिरिफ आरथिक सहायता तक सिमटे नई हे, बल्कि माइलोगन मन ला आत्मबिसवास, सनमान अउ सुआलम्बन के संग आगू बढे के मउका घलो देवत हे। ओ ह कहिस के योजना के सरलग मिलया रासि ह माइलोगन मन ला परिवार के जुम्मेवारी म जादा आगू आके काम करे बर प्रेरित करत हे। श्रीमती सुनीता श्रीवास ह मुख्यमंत्री श्री विष्णु देव साय के आभार जतावत कहिस के महतारी वंदन योजना माइलोगन मन के ससक्तीकरन के रद्दा म एक ठन सराए लइक बुता आय। एकर ले माइलोगन मन के जीबन के इसतर म सुधार होवत हे अउ ओमन सुआलम्बन कोति तेजी ले आगू बढ़त हें।