महतारी वंदन योजना के हितग्राही मन ल बांटे जात हे पौधा
रायपुर, 06 अगस्त 2024। मुख्यमंत्री श्री विष्णुदेव साय ह ‘‘एक पेड़ मां के नाम’’ अभियान के तहत जशपुर जिला म चलत वृहत पौध वितरण अभियान के 2 लाखवां पौधा आज बंदरचुंआ के महतारी वंदन योजना के हितग्राही श्रीमती नीलम टोप्पो ल सौंपिन। जानबा हे कि जशपुर जिला म एक पेड़ मां के नाम अभियान के तहत वृहत वृक्षारोपण बर महतारी वंदन योजना के हितग्राही मन ल निःशुल्क पौधा वितरण करे जात हे, जेकर शुरुआत मुख्यमंत्री श्री विष्णुदेव साय ह बीते महिना 14 जुलाई के दुलदुला ले करे रहिन। मुख्यमंत्री श्री साय ह ‘‘एक पेड़ मां के नाम’’ अभियान के तहत जशपुर जिला म चलत वृहत पौध वितरण अभियान के हितग्राही मन ल प्रमाण पत्र घलोक बांटिन। ए बेरा म मुख्यमंत्री के संग उंखर धर्मपत्नी कौशल्या साय उपस्थित रहिन।
श्रीमती टोप्पो ह बताइस के वो अपन घर के आंगन म अपन सासु मां के नाम ले ये आमा के पौधा लगाही। महतारी वंदन योजना ल लेके वो ह कहिस के ओ ल हर महिना 1 हजार रूपिया मिलत हे। पाछू महिना मिले पइसा ले वो ह अपन बेटा ईशांत टोप्पो बर कॉपी, स्कूल बैग अऊ पाठ्य सामान बिसा के देहे रहिस। वो कक्षा 6 वीं म पढ़त हे। वो ह खुशी जाहिर करत बताइस के में अपन खुद के पइसा ले पहली पइत अपन लइका के स्कूल बर कुछ खरीद के दे सके हंव। ये महतारी वंदन ले मिले राशि ले ही संभव होय हे। महतारी वंदन के राशि के उपयोग में अपन दैनिक उपयोग के सामान खरीदे म करथंव, संगेच कुछ राशि ल भविष्य बर बचत करके रखथंव ताकि आपात स्थिति म ओ राशि के उपयोग करे जा सकय।
