महतारी वंदन योजना ले विद्या जायसवाल ला मिलिस घर के जरूरत पूरा करे के भरोसा

CHHATTISGARHI NEWS: सूरजपुर, लइका मन के छोट-छोट सउंख ला पूरा करे के खुशी के संग एक दाई के आत्मविश्वास अऊ बाढ़ जाथे। सूरजपुर जिला के रामानुजनगर स्थित बाजारपारा के रहइया श्रीमती विद्या जायसवाल बर पहिली घर के छोटे-मोटे खर्चा अऊ लइका मन के पसंद के सामान खरीदना घलो कई बार मुश्किल होत रहिस। ‘महतारी वंदन योजना’ ले हर महीना मिलइया एक हजार रूपिया ह ओला इही जरूरत मन ला अपन दम म पूरा करे के भरोसा देहे हे।
‘सेवा की कहानी’ के तहत अपन अनुभव साझा करत श्रीमती विद्या बताथे के योजना के राशि ओखर दैनिक जिनगी म बहुत काम आवत हे। कभू ओ ह लइका मन के पसंद के जिनिस बिसाथे, त कभू घर बर जरूरी सामान। पहिली ए खर्चा मन बर ओला सोचना परय, फेर अब ओ ह अपन जरूरत के हिसाब से राशि के उपयोग करत हे। लइका मन के चेहरा म हंसी देख के ओला संतोष मिलत हे।
श्रीमती विद्या बर ए सहायता के महत्व सिरिफ ओखर राशि तक सीमित नइहे। घर के जरूरत म अपन योगदान दे पाना अऊ छोटे-छोटे फैसला खुद ले पाना ओखर आत्मविश्वास ला बढ़ाथे। ओ ह बताथे के अब लइका मन के छोट मोट इच्छा पूरा करे बर ओला दूसर मन के ऊपर निर्भर नइ रहना परत हे। हर महीना मिलइया सहायता ओला परिवार के जरूरत के प्रति अउ आश्वस्त करे हे।
मुख्यमंत्री विष्णु देव साय के नेतृत्व म चलइया महतारी वंदन योजना के तहत पात्र महिला मन ला हर महीना एक हजार रूपिया के आर्थिक सहायता देहे जात हे। श्रीमती विद्या के अनुभव ये देखाथे के नियमित सहायता रोजमर्रा के जरूरत पूरा करे के संग महिला मन ला परिवार के निर्णय म सहभागी बने के भरोसा घलो देथे। योजना ले मिले सहायता ला उपयोगी बतावत ओ ह मुख्यमंत्री के प्रति आभार व्यक्त करे हे।