महतारी वंदन योजना ले सशक्त होवत हें छत्तीसगढ़ के महिला मन

हर महिना के आर्थिक मदद बनिस आत्मनिर्भरता के आधार
बलरामपुर, शासन के महत्वाकांक्षी महतारी वंदन योजना छत्तीसगढ़ के महिला मन के जिनगी म बने बदलाव के मजबूत मिसाल बनके उभरे हे। महिला मन के आर्थिक आजादी, पोषण अउ सेहत ल मजबूत करे के उद्देश्य ले शुरू करे गय ए योजना के सुभारंभ प्रधानमंत्री श्री नरेंद्र मोदी ह 10 मार्च 2024 के वर्चुअली करे रिहिन। योजना के तहत राज्य के लगभग 70 लाख बिहाता महिला मन ल हर महिना 1,000 रूपिया के सीधा आर्थिक मदद उंकर बैंक खाता म देहे जात हे। अब तक योजना के अंतर्गत 22 किस्त म कुल 14,306 करोड़ 33 लाख रूपिया के राशि महिला मन के खाता म भेजे जा चुके हे।
ए योजना के असर जमीनी स्तर म साफ दिखत हे। बलरामपुर जिला के ग्राम बुलगांव के श्रीमती रिंकू सिंह के कहानी एकर जियत-जागत उदाहरण हे। खेती-किसानी उपर निर्भर परिवार म पहिली छोटे-छोटे जरूरत घलो बड़का परेशानी बन जावत रिहिस, फेर अब हर महिना तय तारीख ल खाता म अवइया पइसा ले उंकर घर म आर्थिक स्थिरता लहुटे हे। घर के राशन समय म पूरा होवत हे, लइका मन के पढ़ाई-लिखाई ले जुड़े छोटे-छोटे खर्चा आसानी ले पूरा हो जात हे अउ उधार-उधारी ले के मजबूरी खतम हो गे हे।
श्रीमती रिंकू सिंह बताथें के महतारी वंदन योजना ह न सिरिफ खर्चा के समाधान करिस, भलुक उंकर आत्मविश्वास ल घलो बढ़ाइस हे। घर के फैसला मन म उंकर भागीदारी बाढ़े हे अउ चिंता के जगा आत्मनिर्भरता ह ले लेहे हे। श्रीमती रिंकू सिंह जइसे हजारो महिला मन बर ए योजना सम्मान के जिनगी अउ उज्ज्वल भविष्य के मजबूत नींव बनत हे।