बेमेतरा, महात्मा गांधी नरेगा अंतर्गत बहुत अकन अइसे काम हे जेकर प्रत्यक्ष अउ अप्रत्यक्ष रूप ले लाभहोवत हे। योजना के उद्देश्यों के पूर्ति बर जिला बेमेतरा म महात्मा गांधी नरेगा अंतर्गत कई प्रकार के काम कराए जात हे। इही कड़ी म जनपद पंचायत साजा क्षेत्र के ग्राम पंचायत करमू के आश्रित ग्राम तोरण म हितग्राही रज्जू पिता रामजी ह अपन निजी जमीन म साल 2020-21 म फलदार पौधा के रोपण करे गए रहिस। जेखर स्पष्ट परिणाम अभी हाल म दिखत हे। रज्जू ह करीबन एक एकड़ जमीन म 500 बिही (अमरूद) के पेड़ लगाए रहिस, जेन करीबन 2 साल म फल ले लद गए हे।
रज्जू ह बताइस कि ये साल फल ले करीबन एक ले डेढ़ लाख रूपिया के सीधा लाभ वोला होही। योजना के उद्देश्य न केवल मनखे मन ल रोजगार उपलब्ध कराना हे भलुक एखर से मनखे मन ल आर्थिक रूप ले सशक्त करना हे। एकर से वेा ह अपन आर्थिक स्थिति मजबूत करतेच हे अऊ आन मनखे मन ल घलोक रोजगार देवत हे। किसान रज्जू ह अपन जमीन म पहिली सब्जी आदि के खेती करत रहिस, फेर महात्मा गांधी राष्ट्रीय ग्रामीण रोजगार गारंटी योजना अंतर्गत जनपद पंचायत साजा ले पौधरोपण कराये के जानकारी मिले म वो ह परंपरागत खेती ले हटके कुछ नवा परयोग करे के मन बनाइस, जेखर लाभ वोला अब होए लगे हे।
जनपद पंचायत साजा के मुख्य कार्यपालन अधिकारी अउ कार्यक्रम अधिकारी ह बताइस के मनखे मन अइसे काम मन के अनुसरण जरूर करव जेकर से परंपरागत खेती के अलावा महात्मा गांधी राष्ट्रीय ग्रामीण रोजगार गारंटी योजना के माध्यम ले आन प्रकार के खेती ल घलोक बढ़ावा दे सकत हव। जेमां प्रमुख रूप ले मुनगा, नींबू, आम, जामुन, अमरूद आदि के वृक्षारोपण अउ मत्स्य पालन के संगे-संग पशुपालन प्रमुख रूप ले सामिल हे। परियोजना अधिकारी ह जादा ले जादा ग्रामीण परिवार ल ए काम ले जुड़े बर अपील करे हे, संगेच जल संरक्षण के काम मन ल प्राथमिकता ले कराए बर निजी जमीन म निजी डबरी के निर्माण करके संरक्षित जल ले सिंचाई के संगें-संग मत्स्य पालन करके दुहरा लाभ लेहे के समझाइश देहे जात हे।
बेमेतरा : महात्मा गांधी नरेगा के सहयोग ले रज्जू ह लगाये हे 500 बिही)(अमरुद) के पेड़
