मुख्यमंत्री श्री बघेल ह राष्ट्रपिता महात्मा गांधी के जयंती म उमन ल करिन सुरता

छत्तीसगढ़ म समरसता अऊ सांप्रदायिक सद्भाव के जऊन अलख बापू ह जगाईन वो आजो प्रेरित करत हे: श्री बघेल
रायपुर, 01 अकटूबर 2023
मुख्यमंत्री श्री भूपेश बघेल ह आज राष्ट्रपिता महात्मा गांधी के जयंती म उमन ल नमन करिन अउ महात्मा गांधी के देश बर अमूल्य योगदान ल सुरता करत कहिन कि महात्मा गांधी ह भारत म स्वाधीनता आंदोलन ल नवा दिशा दीन। उमन सत्य, प्रेम अऊ अहिंसा के रद्दा अपनाके संसार के आगू मिसाल कायम करिन। उमन देश म जेन ग्राम स्वराज के कल्पना करे रहिन, छत्तीसगढ़ सरकार ओला पूरा करे के दिशा म आगू बढ़त हे।
छत्तीसगढ़ म सुराजी गांव योजना शुरू करके नरवा, गरूवा, घुरवा, बाड़ी ल नवा रूप म विकसित करे जात हे। ये योजना के तहत बने गौठान अब आजीविका केन्द्र के रूप म विकसित होवत हे। गोधन न्याय योजना के माध्यम ले पशुपालक अऊ गांव वाले मन ले गोबर अऊ गोमूत्र खरीदे जात हे, जेखर से ग्रामीण अर्थव्यवस्था ल नवा आधार मिले हे।
श्री बघेल ह कहिन कि गांधी जी ह सबके अच्छा सेहत बर कई परयोग करे रहिन ते पाए के हमन सार्वभौम स्वास्थ्य सेवा ल प्राथमिता देेहे हन। छत्तीसगढ़ म 2019 म गांधी जयंती के दिन ले ही कुपोषण के खिलाफ निर्णायक जंग के ऐलान करत मुख्यमंत्री सुपोषण अभियान के शुरूआत करे गए रहिस। एखर फलस्वरूप प्रदेश के 02 लाख 65 हजार लइका कुपोषण मुक्‍त हो गे हें। करीबन डेढ़ लाख महिला एनीमिया ले बाहिर आ गए हें। ये एक बड़का उपलब्धि हे। छत्तीसगढ़ म मुख्यमंत्री हाट बाजार क्लिनिक योजना, मुख्यमंत्री शहरी स्लम स्वास्थ्य योजना के माध्यम ले घलोक हम आखरी मनखे तक चिकित्सा सुविधा पहुंचाए के उदीम म लगे हन।
श्री बघेल ह महात्मा गांधी के छत्तीसगढ़ प्रवास ल याद करत कहिन कि छत्तीसगढ़ म महात्मा गांधी के सुरता आजो जीवंत हे। स्वतंत्रता संग्राम के समय छत्तीसगढ़ म ऊंखर कंडेल आए के खबर ह ही किसान मन ल जीत देवा देहे रहिस। गांधीजी के छत्तीसगढ़ आगमन ह महिला, पढ़ईया लईका मन, सफाई कर्मचारी मन संग सबो नागरिक मन ल नवा ऊर्जा ले भर दे रहिस। उमन छत्तीसगढ़ म सत्य-अहिंसा, समरसता अऊ सांप्रदायिक सद्भाव के जऊन अलख जगाइन वो आजो प्रेरित करत हे। श्री बघेल ह कहिन कि गांधीजी के देखाय रास्ता म चलत हम ‘नवा छत्तीसगढ़‘ गढ़बो अऊ ऊंखर ग्राम स्वराज्य के सपना ल साकार करबो।