रायपुर, महात्मा गांधी के 150वीं जयंती म आयोजित विधानसभा सत्र के बेरा म आज डॉ. श्यामा प्रसाद मुखर्जी प्रेक्षागृह म मुख्यमंत्री श्री भूपेश बघेल ह पद्मश्री श्रीमती शमशाद बेगम अऊ साथी कमाण्डो मन ल शॉल-श्रीफल भेंट करके सम्मानित करिन। ये बेरा म विधानसभा अध्यक्ष डॉ. चरण दास महंत, संसदीय काम मंत्री श्री रविन्द्र चौबे संग आन मंत्री अऊ विधायक उपस्थित रहिन।
ये मौका म पद्मश्री श्रीमती शमशाद बेगम के संग दुर्ग, राजनांदगांव अऊ बालोद जिला के कई ठन गांव मन के करीबन 350 महिला कमाण्डो मन कार्यक्रम म आए रहिन। पद्मश्री श्रीमती शमशाद बेगम ह बताइस कि ए तीनों जिला मन के कई ठन गांव मन म 10-10 महिला मन ल महिला कमाण्डो बनाए गए हे। ये महिला कमाण्डो मन निःशुल्क रूप ले अपन-अपन गांव मन म नशामुक्ति, स्वच्छता संग बहुत अकन सामाजिक बुराई मन ल मिटाय के काम करत हें। महिला कमाण्डो मन कोति ले सामाजिक बुराई मन ल मिटाए अऊ शिक्षा, स्वास्थ्य, स्वच्छता, पर्यावरण संग सरकार के जन कल्याणकारी योजना मन के प्रचार-प्रसार करे जात हे। कमाण्डो मन कोति ले नशाबंदी, दहेज प्रथा, अंधविश्वास, टोनही प्रथा, लिंग भेद, बाल विवाह, भू्रण हत्या म अंकुश लगाय बर जन-जागरूकता के काम करे जात हे। उमन बताइस कि महिला कमाण्डो मन कानून के दायरा म रहि के काम करत हें। हमला पुलिस के संरक्षण घलोक मिले हे अऊ समय-समय म पुलिस विभाग कोति ले प्रशिक्षण घलोक देहे जात हे। उमन बताइस कि सामाजिक बुराई मन ल खतम करे के उद्देश्य ले महिला कमाण्डो मन के शुरूआत 2006 ले गुण्डरदेही ले होए रहिस अऊ आज 14 जिला मन म एकर विस्तार हो गए हे।
